შატილის გზაზე მომხდარ ავტოკატასტროფასთან დაკავშირებით შსს ახალ განცხადებას ავრცელებს. უწყების ცნობით, დაღუპულთა რიცხვი 17-მდე გაიზარდა, ხოლო დაშავებულია 3 ადამიანი.
ამ დროისთვის არსებული ინფორმაციით, მომხდარის შედეგად, გარდაცვლილია 17 და მძიმედ დაშავდა 3 მოქალაქე. დაშავებულები მაშველებმა უსაფრთხო ადგილზე ამოიყვანეს, რის შემდეგაც სასწრაფო-სამედიცინო დახმარების ჯგუფებმა სამკურნალო დაწესებულებაში გადაიყვანეს.
რთული რელიეფური და მეტეოროლოგიური პირობების მიუხედავად, სამაშველო და ძებნითი სამუშაოები ამ დრომდე, უსაფრთხოების ყველა ნორმის დაცვით, უწყევტ რეჟიმში გრძელდება.
ადგილზე იმყოფებიან საპატრულო და კრიმინალური პოლიციის ეკიპაჟები, საგანგებო სიტუაციების მართვის სამსახურის მეხანძრე-მაშველთა ჯგუფები და სამაშველო ტექნიკა. ადგილზე, ასევე, იმყოფებიან სასწრაფო-სამედიცინო დახმარების ჯგუფებიც.
ავტოსაგზაო შემთხვევა დუშეთის მუნიციპალიტეტში, სოფელ ბისოს სიახლოვეს, შატილის გზაზე მოხდა. სამგზავრო მიკროავტობუსი, დაახლოებით, 80 მეტრის სიმაღლიდან კლდოვან ფერდობზე გადავარდა.
შინაგან საქმეთა სამინისტრომ მომხდარ ფაქტზე გამოძიება საქართველოს სსკ-ის 276-ე მუხლით დაიწყო.- ნათქვამია შსს-ს განცხადებაში.
ავტოკატასტროფის შესახებ ინფორმაცია დღეს საღამოს, დაახლოებით 2 საათის წინ გავრცელდა. თავდაპირველი ცნობით დაღუპული იყო 12 ადამიანი.
დაშავებულების მდგომარეობის შესახებ, ჯანდაცვის სამინისტრომ განცხადება გაავრცელა, სადაც წერია, რომ მათი მდგომარეობა მძიმეა.
"მთავარი არხის" ინფორმაციიით, მიკროავტობუსი, რომელიც 80 მეტრის სიმაღლიდან გადავარდა, ერთ -ერთ ტურისტულ კომპანიას ეკუთვნის.
