აქციის მონაწილეების მიმართ ძალის გადამეტების ფაქტებთან დაკავშირებით მიმდინარეობს გამოძიება | საგამოძიებო

სპეციალური საგამოძიებო სამსახურის ცნობით, რუსული კანონის საწინააღმდეგო აქციის მონაწილეების მიმართ ძალის გადამეტების ფაქტებთან დაკავშირებით დაწყებულია გამოძიება.

"2024 წლის 30 აპრილსა და 1 მაისს,  საქართველოს პარლამენტის მიმდებარედ მიმდინარე საპროტესტო აქციის დროს, აქციის მონაწილეების მიმართ ძალის გადამეტების ფაქტებთან დაკავშირებით, სპეციალურ საგამოძიებო სამსახურში მიმდინარეობს გამოძიება სამსახურებრივი უფლებამოსილების ძალადობით შესაძლო გადამეტებით, საქართველოს სისხლის სამართლის კოდექსის 333-ე მუხლის მე-3 ნაწილის ,,ბ" ქვეპუნქტით.

სპეციალური საგამოძიებო სამსახური მომხდარ ფაქტებზე შეტყობინებებს ცხელი ხაზით, დროებითი მოთავსების იზოლატორებიდან და სახალხო დამცველის აპარატიდან ღებულობს და ახდენს შესაბამის სამართლებრივ რეაგირებას, იგეგმება და ტარდება საგამოძიებო მოქმედებები.

გამოძიების მიმდინარეობის და შედეგების თაობაზე საზოგადოებას მიეწოდება ინფორმაცია," - ნათქვამია განცხადებაში.

ცნობისთვის, გუშინ, 30 აპრილს, შინაგან საქმეთა სამინისტრომ და მათმა დანაყოფებმა რუსული კანონის საწინააღმდეგო აქცია დაარბია. ისინი მშვიდობიანი დემონსტრანტების წინააღმდეგ წიწაკის სპრეის, მხუთავ აირისა და წყლის ჭავლს იყენებდნენ. დააკავეს 63 ადამიანი. 

ფოტო: "პუბლიკა"