ეს არ იქნებოდა პნევმატური იარაღი, ძალიან დამსხვრეულია აქვს ძვლები | კურიერები დღეს პროტესტის ნიშნად იმ მისამართზე მივლენ, სადაც ახალგაზრდა კაცს გაუსწორდნენ
გამოქვეყნდა:
დაჭრილი და ნაცემი "გლოვოს" კურიერი კლინიკაში რჩება. 32 წლის თემურ სიგუას გუშინ 3 ოპერაცია ჩაუტარდა, ამ ეტაპზე ფეხის თითების ამპუტაციის რისკი გამოირიცხა. "მთავარის" ინფორმაციით, კაცი, რომელმაც კურიერი დაჭრა იდენტიფიცირებულია, თუმცა ის დაკავებული ჯერ ისევ არ არის.
დაშავებულის დედას ეჭვი აქვს, რომ მის შვილს არა პნევმატური, არამედ ცეცხლსასროლი იარაღით ესროლეს, რადგან მისი დაზიანება მძიმეა. დღეს "გლოვოს" კურიერები პერფორმანსის მოწყობას აპირებენ, მივლენ იმ მისამართზე, სადაც მათ თანამშრომლებს გაუსწორდნენ და აპირებენ ადგილზე დიდი ოდენობით ლუდი მიიტანონ იმის ნიშნად, რომ მსგავსი რამის გამო ადამიანი არ უნდა გაიმეტონ.
"ეს არ იქნებოდა პნევმატური და ტრავმატული იარაღი, [ვარაუდობთ, რომ ჩვეულებრივი ცეცხლსასროლია?] ვვარაუდობთ, იმიტომ, რომ ძალიან დამსხვრეულია აქვს ძვლები, ძალიან. ერთ-ერთს დაუხმარებია, ეს დავარდნილი, სამი ტყვია მოხვედრილი, აუყვანია, მოტოზე დაუსვია, მიდიო ძმაო, ახლა გააღწიე აქედან სანამ უარესი არ მოხდაო", - ყვება დედა, ელენა ჩოგვაძე.
შემთხვევა ნუცუბიძეზე 2 დღის წინ მოხდა. არსებული ინფორმაციით, კონფლიქტი იმას მოჰყვა, რომ შეკვეთას ლუდი აკლდა. სიგუა მისამართზე მიბრუნდა, რა დროსაც ჯერ სიტყვიერი დაპირისპირება იყო, შემდეგ კი ფიზიკური. კურიერს არსებული ინფორმაციით, რვა ადამიანი გაუსწორდა.
