კორონავირუსი საგანგებო სიტუაციების მართვის სამსახურის ორ თანამშრომელს დაუდასტურდა
გამოქვეყნდა:
საგანგებო სიტუაციების მართვის სამსახურის ბათუმის მეორე და გლდანის განყოფილებების ორ მეხანძრე-მაშველს კოვიდ-19 დაუდასტურდა. უწყების ცნობით, მათი გეგმიური ტესტირების დადებითი პასუხი დღეს, 18 სექტემბერს გახდა ცნობილი.
როგორც განცხადებაშია ნათქვამი, ამ დროისთვის, მეხანძრე-მაშველები შესაბამის დაწესებულებებში იმყოფებიან, სადაც მკურნალობას გადიან.
მათ ცვლაში მყოფ მეხანძრე-მაშველებს დამატებითი ტესტირება ჩაუტარდათ და გადაყვანილი არიან იზოლაციაში, დაკვირვების ქვეშ. შენობებს უკვე ჩაუტარდა სრული დეზინფექცია, - აღნიშნულია საგანგებო სიტუაციათა მართვის სამსახურის განცხადებაში.
18 სექტემბერს ქვეყანაში კორონავირუსით ინფიცირების 182 ახალი შემთხვევა დადასტურდა, გამოჯანმრთელდა 13 ადამიანი.
ბოლო მონაცემებით საქართველოში:
- კორონავირუსით ინფიცირებულია - 3 119;
- გამოჯანმრთელებულია - 1 435;
- მათ შორის გარდაცვლილია - 19;
- კარანტინის რეჟიმში რჩება - 6 633;
- სტაციონარში მეთვალყურეობის ქვეშ - 836, მათ შორის საქართველოში სამკურნალოდ გადმოყვანილია - 41 პაციენტი.
შეგახსენებთ, რომ კორონავირუსის პირველი დადასტურებული შემთხვევა საქართველოში 26 თებერვალს გამოვლინდა.
