სეზონურ გრიპებთან ერთად ქვეყანაში პანიკა დაიწყება - ჯანდაცვის სპეციალისტები გაუმართავ სისტემაზე

სპეციალისტები ეჭვობენ, რომ ქვეყანაში სეზონური გრიპების დაწყების შემდეგ კრიზისი გარდაუვალი იქნება. საავადმყოფოებში და საკარანტინო სივრცეებში მოქალაქეები ტესტის პასუხებს უკვე რამდენიმე დღეა ელოდებიან.

18-ში გამიკეთეს და დღემდე არ მოსულა პასუხი, გუშინ ველოდებოდი, რადგან ჩემთან ერთად ვინც აიღო ტესტი 13-მა ადამიანმა, იმათი პასუხები მოვიდა და გაუშვეს. არანაირი სიმპტომი არ მაწუხებს, გამოკეტილი ვარ და ვერ გამაგებინეს რა ხდება, არ იციან როდის იქნება პასუხები, - ამბობს პაციენტი ირაკლი ვანაძე.

სპეციალისტები ამბობენ, რომ შესაბამის სტრუქტურებს უკვე უნდა ჰქონდეთ გეგმა, როგორ იბრძოლებენ სეზონური გრიპების წინააღმდეგ მაშინ, როცა ქვეყანაში პარალელურად პანდემია იქნება.

სეზონური გრიპი რომ დაიწყება, ქვეყანაში დაიწყება პანიკა. ორი მიმართულებით, ერთი მიმართულება იქნება ტესტის ჩატარების მსურველთა უზარმაზარი რაოდენობა, რომლებსაც ნებისმიერ წამოხველებაზე, ჰგონია, რომ აქვს კორონავირუსი. ასევე, დადგება რიგები იმუნიზაციის მსურველების, არცერთი პროცესისათვის სისტემა მზად არაა, - ამბობს გენეტიკის ეროვნული ლაბორატორიის მმართველი, გიორგი ჩალაძე.

მისი თქმით, მენეჯმენტის დაბალი ხარისხი და არასწორად აწყობილი სისტემა ამ მხრივ პრობლემებს შექმნის.

პარტია "ლელოში" ამბობენ, რომ პრობლემა იქნება ჯანდაცვის სფეროს წარმომადგენლების გადამზადება და არასაკმარისი ვაქცინები.