მუსიკოსი, მასწავლებელი, ფსიქოლოგები და ჟურნალისტები განსასჯელის სკამზე | სასამართლო პროცესი ქუთაისში

ქუთაისის საქალაქო სასამართლოში სხვადასხვა პროფესიის წარმომადგენლების სასამართლო პროცესი იმართება. 9 ადამიანის მიმართ საქმე ადმინისტრაციული წარმოებით აღიძრა. მათ „ბათუმელებისა“ და „ნეტგაზეთის“ დამფუძნებლის მზია ამაღლობელის პატიმრობის გაპროტესტებისთვის მოსამართლის სახლთან შეკრების გამო ედავებიან. საქმეს მოსამართლე ციცინო მოსიძე განიხილავს.

განსასჯელის სკამზე სხედან:

1. გელა მთივლიშვილი - ჟურნალისტი, საქართველოს ამბები / მთის ამბების რედაქტორი;
2. ნინო ქათამაძე - მუსიკოსი, „ნინო ქათამაძის ფონდის“ დამფუძნებელი;
3. ვლადიმერ აფხაზავა - მასწავლებელი, მასწავლებლის ეროვნული ჯილდოს პირველი მფლობელი;
4. ხვიჩა ვაშაყმაძე - ჟურნალისტი;
5. ქეთევან ფილაური - ფსიქოლოგი;
6. მაია ცირამუა - ფსიქოლოგი;
7. ირინა ზარანდია - სამოქალაქო აქტივისტი;
8. გივი ცინცაძე - ლანჩხუთის საკრებულოს წევრი;
9. ეკა კუხალაშვილი - „ქუთაისი პოსტის“ ჟურნალისტი.

ადმინისტრაციულ სამართალდარღვევათა კოდექსის 174-ე პრიმა პირველი მუხლის მესამე ნაწილი, სასჯელის სახით 15 დღემდე ვადით დაპატიმრებას ითვალისწინებს. კოდექსში შეტანილი ცვლილებებით, იგივე ქმედება გამოიწვევს დაჯარიმებას 5 000 ლარის ოდენობით, ან 60 დღემდე პატიმრობას.

ქუთაისის სააპელაციო სასამართლოს საგამოძიებო კოლეგიის თავმჯდომარის მალხაზ ოქროპირაშვილის სახლთან აქცია 26 იანვარს გაიმართა.