"საზღვარი ავტომობილში მოწყობილი სამალავის საშუალებით გადაკვეთა" | შსს ბაჩიაშვილზე განცხადებას ავრცელებს

გიორგი ბაჩიაშვილის მიერ, ქვეყნის დატოვებასთან დაკავშირებით, შსს განცხადებას ავრცელებს.

როგორც სანქცირებული გომელაური სამინისტრო ამტკიცებს, ბაჩიაშვილმა საქართველოს სახელმწიფო საზღვარი 2 მარტს, სასაზღვრო გამტარი პუნქტის გვერდის ავლით, ავტომობილში მოწყობილი სპეციალური სამალავის საშუალებით, სომხეთის მიმართულებით გადაკვეთა, შემდეგ კი,  მის სახელზე გაცემული რუსეთის ფედერაციის მოქალაქეობის დამადასტურებელი სხვა პასპორტი წარადგინა.

შსს-მ გამოძიება სისხლის სამართლის კოდექსის 344-ე მუხლის 1-ლი ნაწილით დაიწყო: 

"გვსურს საზოგადოებას მივაწოდოთ, ამ ეტაპზე გამოძიების ხელთ არსებული ინფორმაცია, გ.ბ.-ს მიერ, სახელმწიფო საზღვრის სავარაუდოდ უკანონო გადაკვეთის ფაქტთან დაკავშირებით.

შინაგან საქმეთა სამინისტროს ცენტრალური კრიმინალური პოლიციის დეპარტამენტში, გამოძიება სისხლის სამართლის კოდექსის 344-ე მუხლის 1-ლი ნაწილით მიმდინარეობს.

მიმდინარე სისხლის სამართლის საქმის გამოძიების ფარგლებში, ამ ეტაპზე დადგენილია, რომ გ.ბ.-მ საქართველოს სახელმწიფო საზღვარი 2 მარტს, სასაზღვრო გამტარი პუნქტის გვერდის ავლით, ავტომობილში მოწყობილი სპეციალური სამალავის საშუალებით, სომხეთის მიმართულებით ფარულად გადაკვეთა, ხოლო აღნიშნულის შემდეგ, სომხეთის სასაზღვრო გამშვებ პუნქტში, მის სახელზე გაცემული რუსეთის ფედერაციის მოქალაქეობის დამადასტურებელი სხვა პასპორტი წარადგინა, რის შედეგადაც გაიარა საზღვარი.

შინაგან საქმეთა სამინისტროში აქტიურად გრძელდება ყველა შესაბამისი საგამოძიებო მოქმედება, აღნიშნული დანაშაულის ჩადენაში თანამონაწილე პირების დადგენა - დაკავების მიზნით.

ინფორმაციას შედეგების შესახებ სამინისტრო საზოგადოებას ეტაპობრივად მიაწვდის. გ.ბ.-ს საზღვრის უკანონო კვეთის ფაქტზე ბრალი წარედგინა." აცხადებს შსს. 

შეგახსენებთ, გიორგი ბაჩიაშვილს პროკურატურამ საზღვრის უკანონო კვეთაზე ბრალი დღეს წარუდგინა. სასამართლო ბაჩიაშვილისთვის აღკვეთის ღონისძიების შეფარდებაზე დღეს იმსჯელებს. პროკურატურა მისთვის დაუსწრებლად, პატიმრობის შეფარდებას მოითხოვს.