მათ პროფესიონალიზმში ეჭვი არ მეპარებოდა და დამოკიდებულება არ შემცვლია - გელა ბეჟუაშვილი მელაშვილსა და ილიჩოვაზე

ყოფილი საგარეო საქმეთა მინისტრი, გელა ბეჟუაშვილი, დაკავებულ ივერი მელაშვილსა და ნატალია ილიჩოვას მხარდაჭერას უცხადებს. ამის შესახებ ბეჟუაშვილმა თავის Facebook-ზე დაწერა. 

2005-2008 წლებში საგარეო უწყების პირველი პირი, გელა ბეჟუაშვლი ასევე წერს, რომ იმედი ჰქონდა მართლმსაჯულების მიუკერძოებლობის. 

შეგახსენებთ, რომ აზერბაიჯანთან საზღვრის დადგენის კომისიის წევრები ივერი მელაშვილი და ნატალია ილიჩოვა 7 ოქტომბერს დააკავეს. სასამართლომ მათ 8 ოქტომბერს წინასწარი პატიმრობა შეუფარდა.
არცერთი დაკავებული წარდგენილ ბრალს არ აღიარებს. პროკურატურა მათ სადემარკაციო კომისიაში მუშაობისას, საქართველოს ტერიტორიული ინტერესების საწინააღმდეგო რუკებით მუშაობაში ადანაშაულებს.

საგამოძიებო უწყების მტკიცებით, "ექსპერტიზის დასკვნით დადგინდა, რომ ბრალდებულები საზღვრების დელიმიტაციის პროცესში ხელმძღვანელობდნენ 1970-80-იან წლებში გამოცემული რუკებზე დატანილი საზღვრის ხაზებით, რაც, როგორც აღინიშნა, არსებითად ეწინააღმდეგება ჩვენი ქვეყნის ისტორიულ საზღვარს, მათ შორის, დავითგარეჯთან მიმართებაში."

დაკავებულების წინააღმდეგ გამოძიება საქართველოს სისხლის სამართლის კოდექსის 308-ე მუხლის პირველი ნაწილით მიმდინარეობს, რაც 10-დან 15 წლამდე პატიმრობას ითვალისწინებს.