ბაღდათის მუნიციპალიტეტის სოფელ დიმში ავტოსაგზაო შემთხვევის შედეგად ოთხი ადამიანი დაიღუპა, ორი მძიმედ დაშავდა. არსებული ინფორმაციით, მსუბუქ ავტომობილში მსხდომი ექვსივე პირი ერთი ოჯახის წევრები არიან.
ცნობილია, რომ ავტომობილი მაღალი სიჩქარით მიდიოდა, რა დროსაც ბორდიულს შეეჯახა და ამობრუნდა.
ადგილზე საპატრულო პოლიციის ეკიპაჟები და სასწრაფო დახმარების ჯგუფებია მობილიზებული და დაშავებულები საავადმყოფოში გადაჰყავთ.
როგორც "მთავარს" შინაგან საქმეთა სამინისტროში უთხრეს, მომხდარზე გამოძიება სისხლის სამართლის კოდექსის 276-ე მუხლის მეექვსე ნაწილით დაიწყო, რაც მექანიკური სატრანსპორტო საშუალების მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ადამიანის სიცოცხლის მოსპობა გამოიწვია.
