დიღომში "საქართველოს ბანკის" დაყაჩაღებისთვის დაცვის პოლიციის თანამშრომელი დააკავეს
გამოქვეყნდა:
შინაგან საქმეთა სამინისტროს განცხადებით, დიღომში "საქართველოს ბანკის" ექსპრეს ფილიალის დაყაჩაღების გამო 1981 წელს დაბადებული ი.ჯ. დააკავეს. ბრალდებული ი.ჯ. არის დაცვის პოლიციის დეპარტამენტის თანამშრომელია, ამიტომ საქმე გამოსაძიებლად საქართველოს გენერალურ პროკურატურას გადაეცა.
"გამოძიებით დადგინდა, რომ დაკავებული 27 ნოემბერს, თბილისში, დიღმის მასივში მდებარე საქართველოს ბანკის ექსპრეს ფილიალში შეიჭრა, იარაღის მუქარით მოლარეს 10 000-ზე მეტი ლარის ოდენობის თანხა გასტაცა და შემთხვევის ადგილიდან მიიმალა", - წერია უწყების განცხადებაში.
დაკავებულის პირადი ჩხრეკისას ნივთმტკიცებად ამოღებულია დანაშაულის ჩადენის იარაღი - ხმოვანი პისტოლეტი და ყაჩაღური გზით გატაცებული თანხის ნაწილი.
ი.ჯ. დანაშაულს აღიარებს.
დიდი ოდენობით ნივთის დაუფლების მიზნით ჩადენილ ყაჩაღობის ფაქტზე გამოძიება საქართველოს სისხლის სამართლის კოდექსის 179-ე მუხლის მე-3 ნაწილის „გ“ ქვეპუნქტით მიმდინარეობს.
დანაშაული 8-დან 12 წლამდე ვადით თავისუფლების აღკვეთას ითვალისწინებს.
