გიორგი რურუას ცემის საქმეზე პროკურატურამ ციხის თანამშრომლებს ბრალდება წარუდგინა და პატიმრობას ითხოვს

გიორგი რურუას ცემის საქმეზე, საქართველოს პროკურატურამ N8 პენიტენციური დაწესებულების ორ თანამშრომელს ბრალდება წარუდგინა.

ლ.გ.-ს და შ.მ-ს ბრალი სამსახურებრივ გულგრილობაში ედებათ. პროკურატურა მათთვის აღკვეთის ღონისძიებად პატიმრობას ითხოვს და შესაბამისი შუამდგომლობით თბილისის საქალაქო სასამართლოს კანონით დადგენილ ვადაში მიმართავს.

საქართველოს იუსტიციის სამინისტროს გენერალურ ინსპექციაში მიმდინარე გამოძიებით დადგინდა, რომ  #8 პენიტენციური დაწესებულების უსაფრთხოების განყოფილების უფროსმა ინსპექტორმა შ.მ.-მ და სამართლებრივი რეჟიმის განყოფილების მთავარმა ინსპექტორმა ლ.გ.-მ არაჯეროვნად შეასრულეს  სამსახურებრივი მოვალეობა, მისდამი დაუდევარი დამოკიდებულების გამო, დაარღვიეს სასჯელაღსრულების, პრობაციისა და იურიდიული დახმარების საკითხთა მინისტრის 2013 წლის 01 აგვისტოს №200 ბრძანებით დამტკიცებული „პენიტენციურ დაწესებულებებში სამართლებრივი რეჟიმის ორგანიზების ინსტრუქციის” მოთხოვნები, რასაც შედეგად მოჰყვა  პატიმრების  მიერ 2020 წლის 02 ნოემბერს,  ამავე დაწესებულებაში მოთავსებული მსჯავრდებულის გ.რ.-ს ჯგუფურად ცემა, რამაც ამ უკანასკნელის უფლების და სახელმწიფოს კანონიერი ინტერესების არსებითი დარღვევა გამოიწვია. 
ლ.გ.-ს და შ.მ-ს ბრალდება საქართველოს სისხლის სამართლის კოდექსის 342-ე მუხლის პირველი ნაწილით (სამსახურებრივი გულგრილობა, ესე იგი მოხელის ან მასთან გათანაბრებული პირის მიერ თავისი სამსახურებრივი მოვალეობის შეუსრულებლობა ან არაჯეროვნად შესრულება მისდამი დაუდევარი დამოკიდებულების გამო, რამაც ფიზიკური ან იურიდიული პირის უფლების, საზოგადოების ან სახელმწიფოს კანონიერი ინტერესების არსებითი დარღვევა გამოიწვია) - ნათქვამია გავრცელებულ ინფორმაციაში.

შეგახსენებთ, "მთავარი არხის" დამფუძნებლის პოლიტპატიმარ გიორგ რურუაზე თავდასხმისთვის ცისი 2 თანამშრომელი გუშინ, 16 დეკემბერს  დააკავეს.