კორონავირუსთან დაკავშირებული შეზღუდვები, შესაძლოა, 16 იანვრიდან ისევ გაგრძელდეს - გადაწყვეტილება დამოკიდებული იქნება ინფიცირებულთა ყოველდღიურ რაოდენობაზე.
თავის მხრივ, სავაჭრო ცენტრებისა და ბაზრობების წარმომადგენლები ფიქრობენ, რომ რეგულაციების გახანგრძლივება კრიზისს გაამწვავებს.
- "ზარალი უკვე ძალიან დიდია. თითოეულ მოვაჭრეს, რომელიც 2 თვეა სახლში ზის და საქონელს ვერ ყიდის, უდიდესი ნაშთი ექნება", - ამბობს ერთერთი ბაზრობის ადმინისტრატორი, ზაქარია ნოზაძე.
- "წინასაახალწლო ნავაჭრი იმდენი არ იყო, როგორც დეკემბერშია ხოლმე. ამის გათვალისწინებით, იანვარში არგახსნა ინდუსტრიისთვის სახარბიელო არ იქნება", - ამბობს გლდანი მოლის ერთერთი მეწილე, თინა კუხიანიძე.
საკოორდინაციო საბჭოს დღევანდელ ბრიფინგზე ჯანდაცვის მინისტრის მოადგილემ, თამარ გაბუნიამ, თქვა, რომ საახალწლო და საშობაო მობილობა რისკის მატარებელია. სწორედ ამიტომ, მისივე შეფასებით, მომდევნო 2 კვირაზე მონიტორინგი მნიშვნელოვანი იქნება შეზღუდვების შემსუბუქებაზე გადაწყვეტილების მისაღებად.
შეგახსენებთ, რომ წინასწარი ინფორმაციით, 16 იანვარი - 31 იანვრის პერიოდში ქვეყნის მასშტაბით:
- აღდგება მუნიციპალური და საქალაქთაშორისო ტრანსპორტის მუშაობა, სავაჭრო ობიექტებისა და ღია და დახურული ბაზრობების მუშაობა (გარდა შაბათ-კვირისა).
- შაბათ-კვირას ტრანსპორტი, სავაჭრო ობიექტები და ბაზრობები აჩერებენ მუშაობას.
მიუხედავად ამისა, უცნობია, როდემდე გაგრძელდება შეზღუდვა, რადგან წინასაახალწლო პერიოდშიც ერთადერთი, რამაც ფუნქციონირება აღადგინა, მოლები იყო.
