სახელმწიფო შესყიდვებში გასამარჯვებლად სამშენებლო ფირმის დირექტორი ყალბ დოკუმენტებს ამზადებდა
გამოქვეყნდა:
ფინანსთა სამინისტროს საგამოძიებო სამსახურის ინფორმაციით, შიდა ქართლის რეგიონში სამშენებლო ფირმის დირექტორი სახელმწიფო შესყიდვებში გამარჯვების მიზნით ყალბ ხელშეკრულებებს ამზადებდა. უწყებამ მის წინააღმდეგ სისხლისსამართლებრივი დევნა დაიწყო.
"სამშენებლო ფირმის დირექტორმა, სახელმწიფო შესყიდვებში გამარჯვების მოპოვების მიზნით, 2018-2019 წლებში დაამზადა და სხვადასხვა შემსყიდველ ორგანიზაციებს წარუდგინა 2 529 645 ლარის ღირებულების ყალბი ხელშეკრულებები, რის შედეგადაც, საწარმოს გაუფორმდა სახელმწიფო შესყიდვის შესახებ ხელშეკრულებები.
გამოძიებით დადგინდა, რომ შემსყიდველი ორგანიზაციებისათვის წარდგენილი ყალბი ოფიციალური დოკუმენტებით გათვალისწინებული ოპერაციები ფაქტობრივად არ განხორციელებულა", - წერია უწყების განცხადებაში.
გამოძიება მიმდინარეობს საქართველოს სისხლის სამართლის კოდექსის 362-ე მუხლის პირველი ნაწილით, რაც სასჯელის სახით ითვალისწინებს თავისუფლების აღკვეთას 3 წლამდე ვადით.
