გერმანელმა დიჯეიმ დისკრიმინაციის მოტივით ძალადობის ფაქტი უარყო - პროკურატურა

პროკურატურა აცხადებს, რომ გერმანელმა დიჯეიმ Phase Fatale-მ, რომელსაც 30 ივლისს ბათუმში თავს დაესხნენ, გამოკითხვისას დისკრიმინაციის მოტივით ძალადობა უარყო. უწყება ამბობს, რომ დიჯეიმ არც კლუბის დაცვის თანამშრომლის მხრიდან ძალადობა დაადასტურა. 

პროკურატურა აცხადებს, რომ დიჯეიმ სოციალურ ქსელში ჰომოფობიური და დისკრიმინაციის მოტივით ძალადობა აღელვებით განმარტა.

"გამოძიებით დადგინდა, რომ 2021 წლის 30 ივლისს, დილის საათებში, ბათუმის ბულვარში მდებარე ღამის კლუბ „სფეროს’’ მიმდებარე ტერიტორიაზე ყოფნისას, ლ.ჭ.-მ ურთიერთშელაპარაკების ნიადაგზე წარმოშობილი უთანხმოების გამო, იძალადა ჰ.ვ.მ.-ზე, რამაც ამ უკანასკნელის ფიზიკური ტკივილი გამოიწვია.

ჰ.ვ.მ.-მ გამოკითხვისას მის მიმართ დისკრიმინაციის მოტივით განხორციელებული ძალადობის ფაქტი და ასევე, ღამის კლუბის დაცვის თანამშრომლის მხრიდან ძალადობა უარყო, ხოლო რაც შეეხება სოციალურ ქსელში გავრცელებულ ინფორმაციას, სადაც ჰ.ვ.მ. ჰომოფობიურ და დისკრიმინაციული მოტივით განხორციელებულ ძალადობაზე საუბრობდა, დაზარალებულმა განმარტა, რომ აღნიშნული ინფორმაციის გავრცელება გამოწვეული იყო აღელვების ნიადაგზე და სიმართლეს არ შეესაბამება", - წერია უწყების განცხადებაში.

მომხდარზე პროკურატურამ ლ.ჭ-ს ბრალდება  საქართველოს სსკ-ის 126-ე მუხლის პირველი ნაწილით წარუდგინა, რაც სასჯელის სახედ და ზომად ერთ წლამდე ვადით თავისუფლების აღკვეთას ითვალისწინებს.