ყველა ქვეყანას მოვუწოდებთ, სკოლები არ დაკეტონ - UNICEF, WHO და UNESCO
გამოქვეყნდა:
"ყველა ქვეყანას მოვუწოდებთ, სკოლები არ დაკეტონ"- ჯანდაცვის მსოფლიო ორგანიზაციის ევროპის რეგიონალური ოფისი და გაეროს ბავშვთა ფონდის ევროპისა და ცენტრალური აზიის რეგიონალური ოფისი სკოლებს მოუწოდებენ გაიხსნან და შექმნან უსაფრთხო გარემო ვირუსის გავრცელების მინიმიზაციისთვის საჭირო ზომების მიღებით.
განცხადებაში აღნიშნულია, რომ უნდა აიცრან 12 წლის და ზემოთ ასაკის ბავშვები, რომელთა სამედიცინო ისტორია მნიშვნელოვნად ზრდის კორონავირუსის მძიმე ფორმით დაავადების რისკს.
ორგანიზაციები წერენ, რომ მნიშვნელოვანია სასკოლო გარემოს გაუმჯობესება, საკლასო ოთახების უკეთესი განიავება, საჭიროებისამებრ ბავშვების მცირე კლასებად დაყოფა, ფიზიკური დისტანცირების უზრუნველყოფა და და ბავშვებისა და პერსონალის რეგულარული ტესტირება.
"პანდემიამ გამოიწვია საგანმანათლებლო პროცესის კატასტროფული შეფერხება, რომელიც ისტორიას არ ახსოვს. შესაბამისად, სასიცოცხლოდ მნიშვნელოვანია ევროპის რეგიონში შეუფერხებლად გაგრძელდეს სწავლება საკლასო ოთახებში. ბავშვთა განათლების, ფსიქიკური ჯანმრთელობისა და სოციალური უნარებისთვის უაღრესად მნიშვნელოვანია, სკოლებმა ხელი შეუწყონ ბავშვებს, ბედნიერები და საზოგადოების პროდუქტიული წევრები იყვნენ. [...]
ყველა ქვეყანას მოვუწოდებთ, სკოლები არ დაკეტონ, ხოლო ყველა სკოლას მოვუწოდებთ, აამოქმედონ კორონავისურისა და მისი სხვადასხვა ვარიანტების გავრცელების რისკის შესამცირებლად საჭირო ზომები",- თქვა ჯანდაცვის მსოფლიო ორგანიზაციის ევროპის რეგიონის დირექტორმა ჰანს ჰენრი კლუგემ.
მან კიდევ ერთხელ აღნიშნა, რომ ვაქცინა ვირუსისგან დაცვის საუკეთესო საშუალებაა.
სკოლების ღიაობისა და უსაფრთხოების უზრუნველსაყოფად, მსოფლიო ჯანდაცვის ორგანიზაციამ, გაეროს ბავშვთა ფონდმა და იუნესკომ დაამტკიცეს შემდეგი რეკომენდაციები:
- სკოლები უნდა იყოს პირველი, რომლებიც გაიხსნება და ბოლო, რომლებიც დაიხურება.
- შემუშავდეს ტესტირების სტრატეგია.
- შემუშავდეს რისკის შემცირებისთვის საჭირო ქმედითი ზომები.
- დაცული იქნას ბავშვების ფსიქიკური ჯანმრთელობა და სოციალური კეთილდღეობა.
- დაცული იქნან ყველაზე მოწყვლადი და მარგინალიზებული ბავშვები.
- გაუმჯობდეს სასკოლო გარემო.
- ბავშვები და მოზარდები ჩაერთონ გადაწყვეტილების მიღების პროცესში.
- აქტიურად განხორციელდეს ვაქცინაცია, რათა ბავშვები სკოლებში შევინარჩუნოთ.
