5-6 ივლისის ძალადობის საქმეზე, ადმინისტრაციული დევნის შეწყვეტის შემდეგ, დღეს საქალაქო სასამართლოში, 27 ბრალდებულის სასამართლო პროცესი იმართება. დღეს, ჟურნალისტებზე თავდამსხმელებისთვის, რომლებსაც 2 თვიანი წინასწარი პატიმრობა აქვთ შეფარდებული, აღკვეთი ღონისძიების გადახედვა იგეგმება. 4 სასამართლო პროცესი, ერთმანეთის პარალელურად მიმდინარეობს.
შეგახსენებთ, რომ 5 ივლისის მოძალადეების წინააღმდეგ ადმინისტრაციულ საქმეთა წარმოება შეწყდა.
ჯამში ადმინისტრაციული წესით საქმე აღძრული იყო 100-ზე მეტი პირის წინააღმდეგ. ირკვევა, რომ პირდაპირ ეთერში და ჩართული კამერების წინ ჩადენილი სამართალდარღვევების დასამტკიცებლად პოლიციამ ვერ შეძლო საკმარისი მტკიცებულებების მოგროვება.
ძალადობრივი ჯგუფების თავდასხმების შედეგად საერთო ჯამში 50-ზე მეტი ჟურნალისტი დაშავდა, მათგან ერთ-ერთი, ტელეკომპანია პირველის ოპერატორი ლექსო ლაშქარავა რამდენიმე დღეში გარდაიცვალა.