შსს-ს თანამშრომლები დედაქალაქში მობილიზებული იქნებიან - შსს-ს გაფრთხილება
გამოქვეყნდა:
შინაგან საქმეთა სამინისტროს ცნობით, თბილისში, 8 ნოემბერს, 20:00 საათზე თავისუფლების მოედანზე დაგეგმილი საპროტესტო აქციის გამო, შსს-ს თანამშრომლები უსაფრთხოების ზომებიდან გამომდინარე და მოვლენების "ხელოვნურად ესკალაციის" თავიდან არიდების მიზნით, დედაქალაქში მობილიზებული იქნებიან და საზოგადოებრივ წესრიგს დაიცავენ.
უწყებაში ამბობენ,რომ „შეკრებებისა და მანიფესტაციების შესახებ“ საქართველოს კანონის შესაბამისად, აკრძალულია ადმინისტრაციული ორგანოების ბლოკირება და მათი საქმიანობის შეფერხება.
"შინაგან საქმეთა სამინისტრო იცავს ჩვენი მოქალაქეების საქართველოს კონსტიტუციით გარანტირებულ მშვიდობიანი შეკრებებისა და მანიფესტაციის გამართვის უფლებას.
შინაგან საქმეთა სამინისტრო მიმდინარე აქციების და შეკრებების დროს მოქალაქეებსა და პოლიტიკურ ლიდერებს მოუწოდებს, დაიცვან საქართველოს კონსტიტუცია, პატივი სცენ პოლიციელთა პროფესიულ საქმიანობას, არ გასცდნენ მშვიდობიანი შეკრების კანონით დადგენილ ფარგლებს, დაემორჩილონ პოლიციის მოთხოვნას და დაიცვან საზოგადოებრივი წესრიგი. კანონდარღვევის ნებისმიერი ფაქტი პოლიციის მხრიდან მყისიერად იქნება აღკვეთილი და შესაბამისი სამართლებრივი რეაგირება მოჰყვება",- ნათქვამია განცხადებაში.
ამავე თემაზე:
