ე.წ. საზღვრის გადაკვეთის ბრალდებით, საოკუპაციო რეჟიმმა საქართველოს მოქალაქეს ერთწლიანი პატიმრობა შეუფარდა
გამოქვეყნდა:
საოკუპაციო რეჟიმმა საქართველოს კიდევ ერთ მოქალაქეს ერთწლიანი პატიმრობა შეუფარდა. ამის შესახებ ინფორმაცია ცენტრალური ხელისუფლების წარმომადგენლებმა ერგნეთში დღეს გამართულ რიგით 103-ე შეხვედრაზე მიიღეს.
საუბარია აგვისტოში დაკავებულ გელა გოჭოშვილზე, რომელსაც რეჟიმი არარსებული საზღვრის გადაკვეთას ედავება. მოლაპარაკებების დროს ოფიციალური თბილისის წარმომადგენლობამ გენადი ბესტაევის ჯანმრთელობის მდგომარეობა, ბორდერიზაცია და ბოლო დროს დაფიქსირებული ინციდენტები გააპროტესტა.
სუს-ის საინფორმაციო ანალიტიკური დეპარტამენტის თავმჯდომარე აცხადებს, რომ აღნიშნულ საკითხებთან ერთად დეკემბრის თვეში ჩანიშნულ ჟენევის ფორმატში დაგეგმილ შეხვედრაზე ირაკლი ბებუას გათავისუფლებას მოითხოვენ, რომელიც სოხუმის იზოლატორში რჩება.
