ატოცი იცლება - DRI საოკუპაციო ხაზთან არსებულ მძიმე ვითარებაზე ხელისუფლებას მიმართავს

„დემოკრატიის კვლევის ინსტიტუტი“ (DRI), სოფელ ატოცის პრობლემებთან დაკავშირებით ხელისუფლებას მიმართავს.

ორგანიზაცია განცხადებაში წერს, რომ მწვავე სოციალური, ეკონომიკური და ინფრასტრუქტურული პრობლემების გამო სოფელი იცლება.

DRI - წარმომადგენლები საოკუპაციო ხაზთან მდებარე სოფელში 2022 წლის 4 თებერვალს იმყოფებოდნენ.

„ატოცში გადაადგილება რთულია, გზა მოყინულია და მხოლოდ სოფლის შუაგულში მდებარე ეკლესიამდეა გაწმენდილი. ადგილობრივი მცხოვრებლების განცხადებით, პრობლემა თვეზე მეტია გრძელდება.

მოსახლეობის თხოვნის მიუხედავად, ადგილობრივმა ხელისუფლებამ ამ დრომდე ვერ მოახერხა სოფლის შიდა დამაკავშირებელი გზების ყინულის საფარისგან გაწმენდა. მოყინული გზის გამო, სოფლის მაცხოვრებლებს პრობლემები ექმნებათ საკვების და საყოფაცხოვრებო ნივთების მომარაგების კუთხითაც.

სოფელში არაა სასურსათო მაღაზია და აფთიაქი. კერძო სამარშრუტო ტაქსი კი, რომელსაც სოფლის მოსახლეობა ხაშურში და ქარელში გადაჰყავს, გზის გაუმართაობის გამო, მათ საცხოვრებელ სახლებამდე ვეღარ მიდის.

ამას ემატება მწვავე სოციალური, ეკონომიკური და ინფრასტრუქტურული პრობლემები აწუხებს, რის გამოც სოფელი იცლება.

იზოლაციისა და უსაფრთხოებასთან დაკავშირებული ყოველდღიური პრობლემების გამო, საოკუპაციო ხაზთან მდებარე სოფლებს განსაკუთრებული ყურადღება ესაჭიროებათ. საკითხზე ინფორმაციის მიღების მიზნით და მოსახლეობისთვის ზემოაღნიშნული საკითხის მოსაგვარებლად, ორგანიზაციამ შიდა ქართლის მხარეში სახელმწიფო რწმუნებულს და ქარელის მუნიციპალიტეტის მერს წერილობით მიმართა“, - ნათქვამია DRI-ის განცხადებაში