ბათუმის მერია 5.4 ტონა სასმელ წყალს იმ საკრებულოსთვის ყიდულობს, რომელიც არ იკრიბება
გამოქვეყნდა:
ბათუმის მერიამ, საკრებულოსთვის, სასმლისა და მინერალური წყლების შესაძენად ორი ტენდერი გამოაცხადა, ჯამში 5 499 ლარით. ამ ტენდერებით ქალაქის საკრებულოსთვის, რომელიც არ იკრიბება, 5 492 ლიტრ წყალს შეისყიდიან.
ინფორმაციას გამოცემა "ბათუმელები" ავრცელებს და წერს, რომ დისპენსერზე დასადგმელი 150 ცალი [19-ლიტრიანი რეზერვუარით] სასმელი წყლის საკრებულოსთვის შესაძენად მერიას 1 500 ლარი აქვს გათვალისწინებული.
მათივე ცნობით, სასმელი წყალი უნდა იყოს ჰიდროკარბონატული-კალციუმიანი, არაგაზირებული; უნდა აკმაყოფილებდეს „სასმელი წყლის ტექნიკური რეგლამენტით“ დადგენილ ხარისხის მაჩვენებლებს, ნორმატიულ სიდიდეებს და სანიტარულ მოთხოვნებს; შენახვის ვადა კი, ჩამოსხმის თარიღიდან მინიმუმ 3 თვე;
მერიას ცალკე ტენდერი აქვს გამოცხადებული საკრებულოსთვის 1 900 ბოთლი გაზირებული მინერალური წყლისა და 3 684 ბოთლი არაგაზირებული მინერალური წყლის შესაძენად [ორთავე სახის წყალი უნდა იყოს 0,5-ლიტრიან პლასტმასის ბოთლებში]. ამ შემთხვევაში სატენდერო თანხა 3 999 ლარია და წყალი საერთაშორისო სტანდარტებს უნდა აკმაყოფილებდეს.
მერიის პირობის მიხედვით:
- „საკრებულოსთვის შესაძენი გაზირებული მინერალური წყლის მინერალიზაცია უნდა იყოს 3-8 გ/ლ;
- არაგაზირებული სასმელი წყალი უნდა იყოს ჰერმეტიული თავსახურით, ბრენდული ეტიკეტით, შესაბამისი თანდატანილი მონაცემებით (შემადგენლობა, მახასიათებლები).
- წარმოება სერტიფიცირებული უნდა იყოს ISO სტანდარტების შესაბამისად.
- შემოტანის დროს საქონლის ვარგისიანობის ვადა უნდა იყოს არანაკლებ მისი ვარგისიანობის მთლიანი ვადის 70%-ისა.“
მერიას ტენდერები უკვე გამოცხადებული აქვს და საკრებულოსთვის ასევე შეისყიდის:
- საკანცელარიო საქონელს – რისთვისაც ქალაქის ბიუჯეტიდან გამოყოფილია 1 499 ლარი;
- ბაინდერებს, საქაღალდეებს, ფაილებს – ტენდერი გამოცხადებულია 1 496 ლარით;
- საკრებულოს საოფისე აპარატურის მიმდინარე რემონტზე ტენდერი გამოცხადებულია პრეისკურანტით – პრეისკურანტის სავარაუდო ღირებულებაა 21 420 ლარი, ხოლო სახელშეკრულებო ღირებულება 3 ათასი ლარი.
- საკრებულოს ავტომობილებისა და მათთან დაკავშირებული მოწყობილობების შეკეთებასა და ტექნიკურ მომსახურებაზეც ტენდერი პრეისკურანტითაა გამოცხადებული – ამ შემთხვევაში პრეისკურანტის სავარაუდო ღირებულებაა 115 886 ლარი, ხოლო სახელშეკრულებო ღირებულება 30 ათასი ლარი.
ბათუმის მერიისა და საკრებულოს ვებგვერდებისა და მეილიების ჰოსტინგის მომსახურებაზე კი მერიას ხელშეკრულება უკვე გაფორმებული აქვს შპს „პროსერვისისთან“ 6 480 ლარზე. კომპანიამ მომსახურება უნდა განახორციელოს 2022 წლის 31 დეკემბრის ჩათვლით პერიოდში.
- ბათუმის საკრებულოსთვის ქალაქის 2022 წლის ბიუჯეტში მთლიანობაში 2 149 600 ლარია გამოყოფილი [აქედან ნახევარზე მეტი – 1 213 100 ლარი, უშუალოდ ხელფასებისთვის].
ცნობისთვის, ბათუმის საკრებულო ამ დრომდე არ იკრიბება. მას თავმჯდომარე ამ დრომდე არ ჰყავს. 2022 წლის 2 აპრილს კი, ბათუმში საკრებულოს მაჟორიტარი წევრის არჩევნები გაიმართება. ადლიის საარჩევნო ოლქში ბათუმის საკრებულოს მაჟორიტარი დეპუტატი „ნაციონალური მოძრაობის“ წევრი, ნუგზარ ფუტკარაძე იყო, რომელიც 2021 წლის ნოემბერში, ახალი საკრებულოს შეკრებამდე გარდაიცვალა.
