"მიხეილ სააკაშვილი დროულად უნდა იქნას გადაყვანილი საზღვარგარეთ" - ექიმები დიპ. კორპუსს და საერთაშორისო საზოგადოებას მიმართავენ

ექიმები საქართველოში აკრედიტებულ დიპლომატიურ წარმომადგენლობებს და საერთაშორისო საზოგადოებას მიმართავენ - მედიკოსები მიხეილ სააკაშვილის ჯანმრთელობის მძიმე მდგომარეობაზე საუბრობენ და პარტნიორებს საქართველოს ხელისუფლებაზე ზეწოლის გაძლიერებას სთხოვენ.

მათ მიაჩნიათ, რომ მესამე პრეზიდენტის მძიმე დიაგნოზი იძლევა იმის საფუძველს, მისი მკურნალობა სხვა ქვეყანაში გაგრძელდეს.

"მივმართავთ საერთაშორისო საზოგადოებას, საქართველოში აკრედიტებულ დიპლომატიურ წარმომადგენლობებს, ადამიანის უფლებათა დაცვის ორგანიზაციებს, კონგრესს, ევროპარლამენტს და სხვა საერთაშორისო ორგანიზაციებს, საქართველოს ხელისუფლებაზე იქონიონ გავლენა. მივმართავთ ასევე საქართველოს ხელისუფლებას, რომ პაციენტ სააკაშვილს, რომელიც იყო საქართველოს მესამე პრეზიდენტი, ჩაუტარდეს გამოკვლევები, საბოლოოდ გაირკვეს მისი დიაგნოზი და გაეწიოს შესაბამისი მკურნალობა", - ამბობს გასტროენტეროლოგთა და ჰეპატოლოგთა საზოგადოების პრეზიდენტი, მანანა ჯებაშვილი.

კლინიკების ასოციაციის დამფუძნებლის, ვილი პაჭკორიას თქმით, აუცილებელია, მიხეილ სააკაშვილი დროულად მოთავსდეს ევროპის ან ამერიკის შეერთებული შტატების ისეთ სამედიცინო დაწესებულებაში, სადაც საჭირო მკურნალობა და რეაბილიტაციის კურსი ჩაუტარდება.