ვინ გახდება საკონსტიტუციო სასამართლოს თავმჯდომარე - ეს დღეს პლენუმის სხდომაზე გაირკვევა. მოსამართლეებმა არჩევანი ორ კანდიდატს, მერაბ ტურავასა და ირინე იმერლიშვილს შორის უნდა გააკეთონ.
ტურავა კანდიდატად ხუთმა მოსამართლემ დაასახელა, იმერლიშვილი კი სამმა. საკონსტიტუციო სასამართლოს თავმჯდომარის პოზიცია 15 ივნისიდან არის თავისუფალი, მას შემდეგ რაც ზაზა თავაძეს მოსამართლის უფლებამოსილება ამოეწურა.
სასამართლოს თავმჯდომარის ასარჩევად საჭიროა, პლენუმის სრული შემადგენლობიდან ანუ ცხრა მოსამართლიდან, კანდიდატმა ხუთი ხმა უნდა დააგროვოს. თუ ხმების ამ რაოდენობას ვერც ერთი კანდიდატი დააგროვებს, იმავე დღეს არჩევნების მეორე ტური უნდა გაიმართოს.
არასამთავრობო ორგანიზაციების წარმომადგენლები ამბობენ, რომ ამ პოსტზე არჩევა კლანთან გარიგების გარეშე შეუძლებელია.
ორივე არის კვალიფიციური იურისტი, მაგრამ, კიდევ ერთხელ ვამბობ, საკონსტიტუციო სასამრთლოს თავმჯდომარის პოსტზე არჩევა, სავარაუდოდ, საჭიროებს კლანთან გარიგება, მაგრამ კლანთან გარიგება დასრულდება ცუდად დამთავრდება ნებისმიერ შემთხვევაში, ამიტომ არც ერთს არ ვურჩევ კლანთან გარიგებას, - ამბობს "კონსტიტუციის 42-ე მუხლის" თავმჯდომარე კახა წიქარიშვილი.
