ამ წუთებში ბათუმში, საკონსტიტუციო სასამართლოს პლენუმის სხდომა მიმდინარეობს. პლენუმმა მომავალი 5 წლით სასამართლოს ახალი თავმჯდომარე უნდა აირჩიოს.
კანდიდატებად დასახელებულია სასამართლოს ორი მოსამართლე: მერაბ ტურავა და ირინე იმერლიშვილი. ტურავა კანდიდატად ხუთმა მოსამართლემ წარადგინა, იმერლიშვილი კი სამმა.
ტურავას მიმართ გაჟღერდა ბრალდება, რომ თუ იგი საკონსტიტუციო სასამართლოს თავმჯდომარე გახდება, ამით "ოცნება" ხელში ჩაიგდებს ამ ინსტიტუციას და კლანი გაძლიერდება. ტურავა პასუხობს, რომ ამ ბრალდებებმა შეიძლება ზეწოლა მოახდინოს მოსამართლეებზე, ამიტომ კომენტარს კენჭისყრის შემდეგ გააკეთებს.
ნებისმიერი თქვენი აჟიოტაჟი და ხმაური, შეიძლება პირიქით, ზეწოლა იყოს სასამართლოს იმ შემადგენლობაზე, რომელმაც გადაწყვეტილება უნდა მიიღოს, - ამბობს მერაბ ტურავა.
საკონსტიტუციო სასამართლოს მოსამართლე გიგა კვერენჩხილაძე ამბობს, რომ ირინე იმერლიშვილის კანდიდატურა მან დააყენა და შესაბამისად, მას დაუჭერს მხარს.
ჩემთვის არანაირი კლანია თუ კლასტერი თუ კონცერნია, ამას ჩემზე არანაირი გავლენა, დამოუკიდებულება არ აქვს, მე ყოველთვის ვიყავი თავისუფალი, ვარ და ვიქნები თავისუფალი, - აცხადებს კვერენჩხილაძე.
პლენუმის სხდომა პოლიტიკური მოძრაობა "ლელოს" აქციის ფონზე მიმდინარეობს, ისინი მერაბ ტურავას არჩევას აპროტესტებენ.
ტურავას კანდიდატურა არის პირდაპირ ბიძინა ივანიშვილის საცეცები საკონსტიტუციო სასამართლოში, რომელიც აქამდე ფორმალურად ინარჩუნებდა დამოუკიდებლობას და იღებდა დამოუკიდებელ გადაწყვეტილებებს, - აცხადებს აქციის ერთ-ერთი მონაწილე.
საკონსტიტუციოს თავმჯდომარედ არჩევას მინიმუმ ხუთი მოსამართლის ხმა სჭირდება. კენჭისყრა ფარულ რეჟიმში ჩატარდება. თუ კენჭისყრა არ დასრულა არჩევნების შედეგით, განმეორებითი პროცესი ერთი თვის შემდეგ გაიმართება.
ავტორი: თეა ვაშალომიძე.
