ბრძოლა ქვეყნის მთავარი მოსამართლის მანტიისთვის გადამწყვეტ ფაზაში გადადის. მალე ბათუმში დაიწყება პლენუმის სხდომა, სადაც მოსამართლეებმა საკონსტიტუციო სასამართლოს თავმჯდომარე უნდა აირჩიონ.
თავმჯდომარის პოსტზე ორი კანდიდატურა სახელდება - მერაბ ტურავა და ირინე იმერლიშვილი. ტურავა კანდიდატად ხუთმა მოსამართლემ დაასახელა, იმერლიშვილი კი სამმა.
საკონსტიტუციო სასამართლოს პლენუმის სხდომა 15:00 საათზეა ჩანიშნული. ტურავას, არსებული ინფორმაციით, მხარს ხუთი მოსამართლე უჭერს, იმერლიშვილს კი ორი. კენჭისყრა ფარულია.
სხდომაზე მოხდება კანდიდატების წარდგენა, შემდეგ კანდიდატებს ექნებათ სიტყვის მიმართვის შესაძლებლობა. შემდეგ პლენუმის წევრებს ექნებათ კითხვების დასმის შესაძლებლობა კანდადატებისთვის, შემდეგ გაიმართება ფარული კენჭისყრა და იმისთვის, რომ გამოვლინდეს თავმჯდომარე, აუცილებელია მოიპოვოს ხუთი მოსამართლის მხარდაჭერა, - ამბობს საკონსტიტუციო სასამართლოს საზოგადოებასთან ურთიერთობის სამსახურის უფროსის მოადგილე გიორგი ლომთაძე.
საკონსტიტუციო სასამართლოს თავმჯდომარის არჩევა, სავარაუდოდ, ხმაურის ფონზე ჩაივლის. მოძრაობა "ლელო" აქციის გამართვას გეგმავს. მისი წარმომადგენელი ანა ნაცვლიშვილი აცხადებს, რომ თავმჯდომარედ მერაბ ტურავას არჩევით "ქართული ოცნებას" ამ ინსტიტუციის ხელში ჩაგდებისკენ გადადგმული კიდევ ერთი ნაბიჯი იქნება.
საკონსტიტუციო სასამართლოს მითვისების ნიადაგი თანდათან მოამზადა "ქართულა ოცნებამ" და ტურავას გამწესებით უნდა ჩაყლაპოს ეს ინსტიტუცია. ვიცით, რომ ტურავას ამ პოზიციაზე ნომინირების კრიტერიუმი არა სამართლის ცოდნა, არამედ მისი "ოცნებისადმი" უპირობო მორჩილებაა, - ამბობს "ლელოს" პოლიტსაბჭოს წევრი.
მან ტურავას "ოცნებისადმი" ლოიალურობის მტკიცებად "რუსთავი 2"-ის საქმე გაიხსენა.
შეგახსენებთ, რომ თუ დღეს ვერ მოხდა საკონსტიტუციო სასამართლოს თავმჯდომარის არჩევა, კენჭისყრა ერთი თვის შემდეგ გაიმართება.
ავტორი: თეა ვაშალომიძე.
