რა კავშირშია ბერა ივანიშვილის უახლოესი მეგობარი შაქარაშვილის მკვლელობის საქმესთან - "მთავარის" ექსკლუზიური ფაქტები

გიორგი შაქარაშვილის მკვლელობის საეჭვო გარემოებები, რომლებიც ადასტურებს, რომ გავლენიანი მფარველები გამოძიების მიმართულების შეცვლას ცდილობენ. პოლიციის უმოქმედობა შემთხვევის ადგილზე, გამოძიებისა და ექსპერტიზის მიერ პროცედურების დაგვიანებით ჩატარება. აშკარა შეუსაბამობები გარდაცვლილის დაზიანებებში და სიკვდილის მიზეზის შეცვლის თვალშისაცემი მცდელობა, თვითმხილველის ჩვენება, რომელიც არ ემთხვევა ოფიციალურ ვერსიას და რაც მთავარია, მოძალადეების გავლენიანი მფარველები.

"მთვარი არხის" ჟურნალისტური გამოძიება გვიჩვენებს, რომ სამართალდამცველების განსაკუთრებული გააქტიურება და "ქართული ოცნების" ხელისუფლების გავლენიანი ლიდერების შეტევა მედიაზე საეჭვოდ ემთხვევა მომენტს, როდესაც გიორგი შაქარიშვილის მკვლელობის შესახებ ჩვენ კრიტიკული შეკითხვები დავსვით და გავარკვიეთ დეტალები, რომელებიც მთლიანად ცვლის სურათს. 

1. რატომ არ მოხდა დღეების განმავლობაში ამოცნობის ჩატარება და უმძიმეს საქმეზე რატომ არ დაკავებულა არც ერთი ადამიანი, ვიდრე მოკვლევა არ დაიწყო "მთავარმა არხმა" და ცნობილი არ გახდა, რომ ჩვენ მოვახდინეთ კონფლიქტში მონაწილე, თბილისიდან ასული სპორტსმენების იდენტიფიცირება.

დღეს დაკავებული მორაგბეები ჯერ კიდევ გიორგის დაკარგვიდან რამდენიმე დღეში უკვე ჰყავდათ დაბარებული მცხეთის პოლიციაში, მორაგბეებს სახე დაფარული ჰქონდათ, იმავე დღეს გამოუშვეს, თუმცა არავინ ასახელებდა კონკრეტულად ფაქტთან კავშირში მათ სახელსა და გვარებს და არც მათი ამოცნობა მომხდარა. თუმცა კადრში ერთ-ერთ მორაგბეს კარგად გამოუჩნდა პოლინეზური ტატუ მარჯვენა ხელსა და კისერზე. ჩვენ მთელი დღის მანძილზე ვეძებდით უმაღლესი ლიგის გუნდებს შორის მსგავსი ტატუთი მორაგბეს, საბოლოოდ ასეთი ვასო მახარაძე აღმოჩნდა. თუმცა მისი იდენტიფიცირებისა და პროფილის შესწავლისას, სისტემა დაიბლოკა და მხოლოდ ნახევარ საათში აღდგა. მახარაძის პროფილის კვლავ მოძიებისას აღმოჩნდა, რომ ის აღარ იძებნება და წაშლილია. თუმცა, ჩვენ მოვასწარით მასალის ჩამოტვირთვა და შენახვა.

მეორე დღეს "მთავარ არხზე" განხორციელდა სამმხრივი შეტევა ხელისუფლების მხრიდან: პარლამენტში საბავშვო პორნოგრაფიასთან დაკავშირებულ სიუჟეტზე, სუსში, სადაც მარნეულში გადაღებული სიუჟეტის გამო სისხლის სამართლის საქმე აღგვიძრეს საბოტაჟის მუხლით და მოგვიანებით, თბილისის მერის, კალაძის მიერ, რომლის პრესკონფერენცია მხოლოდ ჩვენს არხს მიეძღვნა. ხელისუფლების გზავნილი იყო ერთადერთი: "მთავარი არხი" ავრცელებს "ფეიკ ნიუსებს". მიუხედავად ამ შეტევისა, ჩვენ გავაგრძელეთ საქმის შესწავლა და ტელევიზიაში მოსულები იყვნენ ადამიანები, რომლებმაც დამატებითი ინფორმაცი მოგვაწოდეს ამ საქმეზე, ხოლო ტელევიზიის დირექტორმა დადო შემდეგი სტატუსი: 

სუსს და "ქართულ ოცნებას" ვეტყოდი, რომ ტყუილად წვალობენ საბოტაჟით, ბავშვთა პორნოგრაფიით და კალაძის ლაივებით. რისიც გეშინიათ, #გახსნილია.

ამის შემდეგ დაჩქარებულ ტემპში ხდება დაპატიმრებები. სპეცოპერაცია იწყება გვიან, დასახელებული მოვლენების შემდეგ და აპატიმრებენ ყველა იმ პირს, რომელიც ჩვენთვის ცნობილი იყო, როგორც დანაშაულში თანამონაწილე, თუმცა პასუხს არ სცემენ კითხვას, ვინ იყვნენ დანარჩენები, ვინ დგას ამ მოძალადე ორგანიზებული ჯგუფის უკან და რატომ არ ირეაგირა შემთხვევის ადგილზევე და ცხელ კვალზე პოლიციამ. 

2. შეუსაბამობები გარდაცვლილის დაზიანებაში

გუშინ ჩვენთან მოსული წყაროების ჩვენებით, შაქარაშვილის სხეულზე არის მრავლობითი მოტეხილობები ყველა კიდურის და ასევე ჩამტვრეულია თავის ქალა. ამასთან დაკავშირებით ამ ეტაპზე არ გაკეთებულა არავითარი განცხადება. ასევე, კვლევის ხუთდღიანი მიმდინარეობის მიუხედავად, არ არის ექსპერტიზის წინასწარი დასკვნაც კი გარდაცვალების მიზეზთან დაკავშირებით, მაშინ, როცა გარდაცვლილი დაიხრჩო თუ მიყენებული დაზიანებებით გარდაიცვალა, არ წარმოადგენს განსაკუთრებული სირთულისა და ხანგრძლივობის საექსპერტო კვლევას. საეჭვო გარემოებაა ისიც, რომ გარდაცვლილის ოჯახს კატეგორიულად აუკრძალეს ცხედრის ნახვა და იგი ისე დაკრძალეს, რომ ოჯახის წევრებს მიცვალებული არ უნახავთ. 

3. ფოტოგრაფის ჩვენება

ჩვენებით იკვეთება, რომ პოლიცია ადგილზე იმყოფებოდა, თუმცა გაუგებარი რჩება, რატომ არ იმოქმედა, რატომ არ მოიკვლია შემთხვევა, რატომ არ გახსნა დანაშული ცხელ კვალზე და რატომ შეასრულა მხოლოდ მოწმის თბილისში ტრანსპორტირების ფუნქცია. ცხადია, პოლიცია ამგვარად არც და ვერც მოიქცეოდა და საპატრულო ეკიპაჟს საპოლიციო ფუნქცია არ შეუსრულებია. ჩნდება საფუძვლიანი ეჭვი, რომ საპატრულო ეკიპაჟი უბრალოდ უკან გაიხმეს, რათა საკუთარი მოვალეობა არ შეესრულებინა. ცხადია, პოლიციისთვის ამგვარი მითითების მიცემას გავლენიანი ადამიანის ჩარევა სჭირდება. შეგახსენებთ, რომ პატრულმა ყოველგვარი კვლევა-ძიების გარეშე მიატოვა უმძიმესი შემთხვევის ადგილი, მრავალი მძიმედ დაზიანებული, მათ შორის, ერთ-ერთი პრაქტიკულად ყურმოჭრილი ადამიანი და ერთი გარდაცვლილი. 

ჩვენი წყაროების ცნობით, ე.წ. ნახალოვკის სპორტსმენების დაჯგუფებას ხელმძღვანელობს კანონიერი ქურდის, კაკო ბილანიშვილის ვაჟი, ავთო ბილანიშვილი. აღნიშნული პირი აკონტროლებს ნაძალადევის რაიონს და "ქართული ოცნების" მიერ საარჩევნოდ ქუჩის კონტროლი ამ უბანში სწორედ ბილანიშვილის მეშვეობით ხორციელდება. თუმცა, ბილანიშვილის მიერ კონტროლირებადი დანაშულებრივი დაჯგუფების პოლიციის მხრიდან იგნორირებისა და ხელის დაფარების მიზეზი არა მხოლოდ მის "ქართულ ოცნებასთან" კავშირებში უნდა ვეძებოთ.

ავთო ბილანიშვილი არის ბერა ივანიშვილის ყველაზე ახლო მეგობარი, ბერა მისი ბავშვის ნათლიაა და სოციალურ ქსელში არის მათი ახლო კავშირების დამადასტურებელი არაერთი ფოტო. ჩვენთვის ამ ეტაპზე ცნობილი არ არის, იმყოფებოდა თუ არა ბილანიშვილი დანაშაულის ადგილზე ან გასცა თუ არა განკარგულება, ამ მისი დაჯგუფების მცხეთაში გაგზავნასთან დაკავშირებით. თუმცა, ჩვენი წყაროების ცნობით, სწორედ ბილანიშვილს და მის გავლემიან მფარველს, ბერა ივანიშვილს უკავშირდება ის გარემოება, რომ აღნიშნულ საქმეზე პოლიციას არავითარი ქმედითი ნაბიჯი არ გადაუდგამს, ვიდრე ცნობილი არ გახდა, რომ ინფორმაციამ გაჟონა და იძულებული არ გახდა დაეკავებინა სპროტსმენები, მხოლოდ ამ ეტაპზე შაქარაშვილის მკვლელობის ან სხეულის განზრახ მძიმე დაზიანების ბრალდების გარეშე, რაც საეჭვოს ხდის, დაკავებული პირები რეალურად მძიმე სასჯელის საშიშროების წინაშე აღმოჩნდნენ.