"არ ვიცით, რა მოხდა... მითხრეს, რომ ცხედარი გუდაურიდან თბილისში გადმოასვენეს" | დაღუპული პაკისტანელი ტურისტის ცოლი
გამოქვეყნდა:
გუდაურში პარაპლანის ჩამოვარდნის შედეგად დაღუპული ტურისტის ოჯახის წევრები გუდაურის პოლიციაში გამოკითხვაზე იმყოფებოდნენ.
ტრაგიკული შემთხვევის თვითმხილველია გარდაცვლილის ცოლი. მან მცირეწლოვან შვილთან ერთად საკუთარი თვალით ნახა, როგორ დაეშვა ხევში ავარიულად პარაპლანი.
პაკისტანელი ოჯახი საქართველოში სამოგზაუროდ გუშინ ჩამოვიდა.
"პარაპლანით პირველად ჩემი ქალიშვილი დაეშვა, შემდეგ კი ჩემი ქმარი. ძლიერი ქარი იყო, არ ვიცი რა მოხდა. მოგვიანებით გვითხრეს, რომ შემთხვევის ადგილი საკმაოდ რთული რელიეფის იყო, მოვითხოვე ვერტმფრენის გამოძახება. მომხდარიდან მალე მოვიდა ვერტმფრენიც და მაშველებიც, შემთხვევის ადგილს შემოუფრინეს, თუმცა ჩემთვის არაფერი უთქვამთ. მითხრეს, რომ ჩემი ქმრის ცხედარი გუდაურიდან თბილისში გადმოასვენეს, ჩემი მეგობარი და შვილი დაკითხვაზე არიან. ოფიციალური დასტური ჩემი ქმრის გარდაცვალებაზე ჯერ არ მიგვიღია", - ამბობს შერილ მორალ ტიმანი.
ცნობისთვის, გუშინ გუდაურში პარაპლანის ჩამოვარდნის შედეგად ერთი ადამიანი დაიღუპა, ერთი კი დაშავდა. ადგილზე მაშველები გამოიძახეს, თუმცა ვერტმფრენმა, რომელიც დაშავებულის ამოსაყვანად მიდიოდა, ავიაკატასტროფა განიცადა. შედეგად ბორტზე მყოფი რვავე პირი დაიღუპა.
