EU-მ დამატებითი სანქციები დაუწესა ირანს საპროტესტო აქციების დარბევის გამო

ევროკავშირის საგარეო საქმეთა მინისტრებმა ორშაბათს მხარი დაუჭირეს ირანის წინააღმდეგ სანქციების ახალ პაკეტს. ეს არის პასუხი რეჟიმის მიერ მშვიდობიანი საპროტესტო აქციების სასტიკ ჩახშობაზე.

სანქციები ეხება 29 ფიზიკურ პირს და 3 ორგანიზაციას, გაიყინება მათი აქტივები, აიკრძალება მოგზაურობა. 

სანქციები შეეხო რაზმის ოთხ წევრს, რომლებმაც თვითნებურად დააკავეს 22 წლის გოგო მაჰსა ამინი, ირანის სამართალდამცავი ძალების (LEF) და ისლამური რევოლუციის გვარდიის კორპუსის (IRGC) პროვინციის ხელმძღვანელებს, ბრიგადის გენერალს კიიუმარს ჰეიდარს, ირანის არმიის სახმელეთო ჯარების მეთაურს.

შინაგან საქმეთა მინისტრი აჰმად ვაჰიდი და ვაჰიდ მოჰამად ნასერ მაჯიდი, ირანის კიბერპოლიციის ხელმძღვანელი, ასევე იყვნენ სამიზნე, ეს უკანასკნელი "მისი პასუხისმგებლობისთვის ირანის რეჟიმის ონლაინ კრიტიკის გამოთქმისთვის ადამიანების თვითნებურად დაპატიმრებისთვის", - ნათქვამია ევროკავშირის საბჭოს განცხადებაში.

სიაშია სახელმწიფო ტელევიზია Press TV-იც.

ცნობისთვის, პროტესტი 22 წლის ქალის, მაჰსა ამინის გარდაცვალებას მოჰყვა. ის "მორალის პოლიციამ" დააკავა ჰიჯაბის ტარების წესის დარღვევის გამო. მოგვიანებით სამართალდამცავების მიერ ნაცემი გოგო კომატოზურ მდგომარეობაში კლინიკაში მოხვდა და გარდაიცვალა. სექტემბრის შუა რიცხვებიდან ირანის უსაფრთხოების ძალებმა სულ მცირე 326 ადამიანი მოკლეს, მათ შორის არიან ბავშვებიც.