მიხეილ სააკაშვილის საქართველოში დაბრუნება, რა ხდება ახლა მის თავს? | BBC-ის სტატია მესამე პრეზიდენტზე

მიხეილ სააკაშვილის საქართველოში დაბრუნებას ანალიტიკოსები 54 წლის პრეზიდენტის ყველაზე დიდ და საბედისწერო შეცდომასაც უწოდებენ, რამაც საქართველოში ყველაზე დიდ ოპოზიციურ პარტიაზე იმოქმედა და მისთვის პირად ტრაგედიად იქცა - ამის შესახებ სტატიას საერთაშორისო მედია BBC აქვეყნებს . 

სტატია მესამე პრეზიდენტის საქართველოში დაბრუნების ეპიზოდით იწყება. გამოცემა წერს, რომ გასული წლის 1 ოქტომბერს ქართულმა ტელეარხებმა თბილისში საქართველოს მესამე პრეზიდენტის, მიხეილ სააკაშვილის დაკავების კადრები გაავრცელეს.

"სააკაშვილი რვა წლის შემდეგ საქართველოში დაბრუნდა. მის დაკავებას ორი პოლიციელი ხელმძღვანელობდა. სააკაშვილს ხელბორკილები ადევს, მაგრამ გულწრფელად იღიმის" - წერს BBC

"დღეს, ერთ წელზე მეტი ხნის შემდეგ, სააკაშვილი კვლავ პატიმრობაშია, არა ციხეში, არამედ თბილისის კლინიკაში, სადაც ის რამდენიმე თვის წინ გადაიყვანეს. ფეისბუქის საკუთარ გვერდზე ის უკრაინის მოვლენებსა და ომს ეხმაურება. თბილისის საქალაქო სასამართლოში მიმდინარე პროცესებს ვერ ესწრება. მიზეზი მისი ჯანმრთელობაა. ახლობლები ამბობენ, რომ მდგომარეობა დღითი დღე უარესდება. ისინი ერთადერთ გამოსავალს სააკაშვილის საზღვარგარეთ სამკურნალოდ გადაყვანაში ხედავენ"- ნათქვამია სტატიაში. 

ამავე სტატიაში ვკითხულობთ, რომ არასამთავრობო ორგანიზაცია, „ემპათიის ცენტრის“ დასკვნის მიხედვით, რომელმაც უცხოელი სპეციალისტების ჩართულობით ჩაატარა სასამართლო-სამედიცინო ექსპერტიზა, სააკაშვილს პატიმრობასთან შეუთავსებელი სერიოზული დიაგნოზი აქვს.

BBC მთავრობის ადმინისტრაციასთან 20 ნოემბერს მედიკოსების მიერ გამართული აქციითაც დაინტერესდა. 

"20 ნოემბერს მთავრობის ადმინისტრაციის შენობასთან შეიკრიბნენ ექიმები, ექსპრეზიდენტის ახლობლები, ოპოზიციის წარმომადგენლები და მისი მხარდამჭერები სააკაშვილის საზღვარგარეთ სამკურნალოდ გადაყვანის მოთხოვნით... პროტესტის ნიშნად აქციაში მონაწილე ექიმებმა მთავრობის კაბინეტს სამედიცინო ხალათები დაუტოვეს

ხელისუფლებაში აცხადებენ, რომ სააკაშვილი საჭირო და დროულ სამედიცინო დახმარებას იღებს და შესაბამის კლინიკაში იმყოფება. ტელეკომპანია „იმედის“ ეთერში სააკაშვილის მდგომარეობაზე კითხვაზე, იუსტიციის მინისტრმა რატი ბრეგაძემ თქვა, რომ სააკაშვილი რეანიმაციაში კი არა, თერაპიულ განყოფილებაშია და მასთან სტუმრები ყოველდღე დადიან. ."- წერს BBC. 

"მოწამვლა"

BBC წერს, რომ მიხეილ სააკაშვილის ახლობლებისა და ადვოკატების თქმით, მიუხედავად იმისა, რომ ის სამედიცინო დაწესებულებაში იმყოფება, მისი ავადმყოფობების სია იზრდება.

ის აგრძელებს წონაში კლებას, დღითიდღე სუსტდება, უჭირს სიარული და ვერ იყენებს მარცხენა მკლავს. გარდა ამისა, მას აქვს მაღალი ტემპერატურა.

დედის, გიული ალასანიას თქმით, ბოლო დროს დაავადებათა სიას ლატენტური ტუბერკულოზიც დაემატა, თუმცა ექიმები მკურნალობას არ იწყებენ, რადგან ამან შეიძლება სხვა დაავადებების გართულება გამოიწვიოს.

"ადვოკატები ახლა ემპათიის ცენტრის საბოლოო დასკვნას ელოდებიან, რომელსაც ხელს მოაწერენ ქართველი და უცხოელი ექსპერტები, რათა სასამართლოს მიმართონ. დიაგნოზებიდან და მათი სიმძიმიდან გამომდინარე, ისინი აპირებენ მოითხოვონ სააკაშვილის პატიმრობიდან გათავისუფლება ან თუნდაც სისხლისსამართლებრივი პატიმრობის გადადება.

სააკაშვილის დედის, გიული ალასანიას თქმით, ტოქსიკოლოგიური ანალიზის შედეგად დაფიქსირდა ისეთი ნივთიერებები, როგორიცაა თალიუმი, ბარიუმი და ვერცხლის წყალი და უახლოეს დღეებში ახლობლები ამ კუთხით ამერიკელ ექსპერტებისგან ახსნას ელოდებიან.

სააკაშვილის ერთ-ერთმა ადვოკატმა ვალერი გელბახიანმა განაცხადა, რომ სააკაშვილის მოწამვლის საფუძველი არსებობს.

საპასუხოდ, სპეციალურ პენიტენციურ სამსახურში აღნიშნეს, რომ სააკაშვილის მოწამვლის შესახებ ოფიციალური დადასტურება არ მიუღიათ"- ვკითხულობთ სტატიაში. 

"გზა საქართველოსკენ"

BBC წერს, რომ მიხეილ სააკაშვილი ბოლო წლებში ერთ-ერთ მთავარ ფიგურად რჩება ქართულ პოლიტიკურ ასპარეზზე, მიუხედავად იმისა, რომ მან საქართველო მეორე საპრეზიდენტო ვადის ამოწურვის შემდეგ დატოვა. აქ მას ბევრი მხარდამჭერი ჰყავდა და მის მიერ შექმნილი პარტია „ერთიანი ნაციონალური მოძრაობა“ ხელისუფლების შეცვლის შემდეგ გახდა ყველაზე დიდი ოპოზიციური ძალა ქვეყანაში.

"ყოფილმა პრეზიდენტმა, რომელსაც უკრაინის მოქალაქეობა აქვს, სამშობლოში დაბრუნების შესახებ არაერთხელ გამოაცხადა, რამაც მის სამშობლოში არაერთგვაროვანი რეაქცია გამოიწვია. მოსახლეობის ნაწილს ამ გეგმებმა საქართველოში კარდინალური პოლიტიკური ცვლილებების იმედები გაუჩინა, ნაწილი კი შიშობდა, რომ ის კვლავ ხელისუფლებაში იქნებოდა. ეს მოლოდინები არ გამართლდა.

ადგილობრივი არჩევნების წინა დღეს მისმა დაბრუნებამ, შემდეგ კი დაპატიმრებამ გამოიწვია აქციების ტალღა საქართველოში, მაგრამ დროთა განმავლობაში მომიტინგეთა რიგები შემცირდა, მოგვიანებით კი სრულიად გაქრა.

მიმდინარე წლის ივლისში სააკაშვილის ადვოკატებმა განაცხადეს, რომ ის აღარ არის დაინტერესებული ქართული პოლიტიკით."- აღნიშნულია მასალაში. 

"მიხეილ სააკაშვილის წასვლა"

სტატიაში ვკითხულობთ, ასევე, რომ მიხეილ სააკაშვილის პოლიტიკიდან წასვლის გამოცხადების შემდეგ, ზოგიერთმა ექსპერტმა ივარაუდა პოლიტიკური ლანდშაფტის ცვლილება საქართველოში, სადაც აქამდე მხოლოდ ორი ძირითადი პოლიტიკური მოთამაშე იყო - მმართველი პარტია და ნაციონალური მოძრაობა. ამგვარმა პოლარიზებით, ანალიტიკოსების აზრით, ითამაშეს ხელისუფლების წარმომადგენლებმა, რომლებმაც მიხეილ სააკაშვილისგან მტრის ხატი შექმნეს.

"...მაგრამ საზოგადოების აღქმის დონეზე, სააკაშვილის პოლიტიკიდან წასვლა, გია ნოდიას თქმით, არ მომხდარა. ერთიანი ნაციონალური მოძრაობის მხარდამჭერების უმრავლესობისთვის ეს პარტია რჩება სააკაშვილის პარტიად და ლიდერობისთვის ბრძოლა, რომელიც დღეს პარტიის შიგნით დაიწყო, ამას ადასტურებს.

მეტოქეობის ერთ-ერთი თემა აქ არის ის, თუ ვინ არის უფრო ლოიალური სააკაშვილის მიმართ და მზად არის მეტი გააკეთოს მის გასათავისუფლებლად.

სააკაშვილის მომხრეების იმედები, რომ პრეზიდენტი ზურაბიშვილი მას შეიწყალებდა, არ გამართლდა. სალომე ზურაბიშვილმა უკვე განაცხადა, რომ ამას არასოდეს გააკეთებს. BBC-სთან ინტერვიუში მან განმარტა, რომ არ შეეძლო სააკაშვილის შეწყალება, მათ შორის კანონის საფუძველზე, რადგან მისი საქმეების სასამართლო პროცესი არ დასრულებულა. მაგრამ, მისი თქმით, საქართველოში უკვე დაწვრილებით ახსნა, რატომ არ გადადგამს ამ ნაბიჯს.

მისი თქმით, იგი ყურადღებით ადევნებს თვალს ექიმების დასკვნებს და თვლის, რომ სააკაშვილს უნდა მიეცეს საშუალება, დამატებითი მკურნალობა გაიაროს საზღვარგარეთ, მაგრამ ასეთი გადაწყვეტილება სასამართლომ უნდა მიიღოს."- წერს საერთაშორისო მედია. 

BBC სტატიის დასასრულს აღნიშნავს, რომ მიხეილ სააკაშვილის გათავისუფლების მოწოდებები სულ უფრო ხშირად ისმის საერთაშორისო პლატფორმებიდან და დასავლელი პოლიტიკოსებისგან.

ზოგიერთი პოლიტოლოგის აზრით, დასავლეთის პოზიციამ შესაძლოა, აიძულოს ხელისუფლება დათმობებზე წავიდეს, თუ საქართველოსთვის ევროკავშირის კანდიდატის სტატუსის მიღება უფრო მნიშვნელოვანია, ვიდრე შიდა პოლიტიკური ინტერესები.