უკრაინის დახმარების განსახილველად, ამერიკელი სენატორები დახურულ შეხვედრას გამართავენ - CNN
გამოქვეყნდა:
ამერიკელი სენატორები ფარულ შეხვედრას გამართავენ, რათა განიხილონ უკრაინის დახმარების გაზრდის საკითხი. ინფორმაციას CNN სენატის თანაშემწეზე დაყრდნობით ავრცელებს. შეხვედრა ოთხშაბათს 7 დეკემბერს გაიმართება.
CNN-ის ცნობით შეხვედრა მას შემდეგ ჩაინიშნა, რაც თეთრმა სახლმა კიევისთვის დამატებით 37 მილიარდი დოლარის გამოყოფა მოითხოვა. ეს თანხები შეიძლება შევიდეს წლის ბოლოს კონსოლიდირებულ კანონპროექტში, რომელიც უნდა დამტკიცდეს 16 დეკემბრამდე მთავრობის დასაფინანსებლად.
CNN-ის ცნობით, უკრაინის დაფინანსების მოთხოვნა გავრცელებულია აშშ-ის ოთხ სამთავრობო დეპარტამენტში. მენეჯმენტისა და ბიუჯეტის ოფისის დირექტორის მიერ ნენსი პელოსისთვის გაგზავნილი წერილის თანახმად, თანხები "უზრუნველყოფს უკრაინას ჰქონდეს დაფინანსება, იარაღი და მხარდაჭერა, რომელიც მას სჭირდება საკუთარი თავის დასაცავად, ასევე იმისთვის, რომ სოციალურად დაუცველმა ადამიანებმა მიიღონ სასიცოცხლოდ საჭირო დახმარება". გარდა ამისა, თანხები მიმართული იქნება საკვებისა და ენერგიის კრიტიკულ დეფიციტზე, რომელიც გამოწვეულია რუსეთის შემოჭრით.
დახმარება შემდეგნაირად არის გადანაწილებული:
- 21,7 მილიარდი დოლარი თავდაცვის დეპარტამენტისთვის, რომელიც დაიხარჯება "უკრაინის აღჭურვილობისთვის, თავდაცვის დეპარტამენტის მარაგების შევსებაზე და სამხედრო, სადაზვერვო და სხვა თავდაცვის მხარდაჭერისთვის".
- 14,5 მილიარდი დოლარი სახელმწიფო დეპარტამენტისთვის "უკრაინის პირდაპირი ბიუჯეტის მხარდაჭერისთვის, კრიტიკული ომის დროს ინვესტიციებისთვის, უსაფრთხოებისთვის, გლობალური სასურსათო უსაფრთხოების გასაძლიერებლად და ჰუმანიტარული დახმარებისთვის".
- 626 მილიონი აშშ დოლარი ენერგეტიკის დეპარტამენტისთვის "უკრაინის ბირთვული უსაფრთხოების მხარდაჭერისთვის და ნავთობის სტრატეგიული რეზერვის მოდერნიზებისთვის".
- 900 მილიონი აშშ დოლარი ჯანდაცვისა და ადამიანური მომსახურების დეპარტამენტისთვის "უკრაინელი პირობით გათავისუფლებულთათვის სტანდარტული სამედიცინო დახმარებისა და მხარდაჭერის სერვისების უზრუნველსაყოფად".
