მოსახლეობამ პოლიციას საგამოძიებო მოქმედებებში ხელი შეუშალა - ასე ეხმაურება შსს მარნეულში მომხდარ ინციდენტს, რა დროსაც, სამართალდამცველებსა და მოსახლეობას შორის დაპირისპირება მოხდა.
როგორც სამინისტროში ამბობენ, ფაქტზე გამოძიება დაიწყო:
"სისხლის სამართლის საქმეზე მიმდინარე გამოძიების ფარგლებში მოსამართლის განჩინების საფუძველზე სამართალდამცავები ატარებდნენ საგამოძიებო მოქმედება-ჩხრეკას, ადგილზე შეკრებილმა მოსახლეობამ პოლიციას ხელი შეუშალა საგამოძიებო მოქმედების ჩატარებაში.
ფაქტზე დაიწყო გამოძიება სისხლის სამართლის კოდექსის 353-ე მუხლის მეორე და 381 მუხლის პირველი ნაწილით"- ნათქვამია შსს-ს ინფორმაციაში.
მარნეულში მომხდარ ინციდენტთან დაკავშირებით ვიდეომასალა "ფეისბუქის" საშუალებით რაშან ზიადალიევმა გაავრცელა, სადაც ის წერდა, რომ "სოფელ არაფლოში, ერთ-ერთი სახლში ჩხრეკის დროს პოლიციელმა ნარკოტიკული საშუალება ჩაიდო".
შსს-ს ინფორმაციაში არაფერია ნათქვამი ნარკოტიკზე და იმ ბრალდებაზე, რომელსაც ადგილობრივები სამართალდამცველებს უყენებენ.
