ქუთაისის ინფექციური კლინიკა კიდევ ერთმა გამოჯანმრთელებულმა პაციენტმა დატოვა. შუა ხნის ქალს ლაბორატორიულ კვლევაზე ორჯერ უარყოფითი პასუხი დაუფიქსირდა, რაც იმას ნიშნავს, რომ მან „კოვიდ-19“ დაამარცხა.
კლინიკის მთავარი ექიმის, თემურ ნადირაძის განცხადებით, ამ დროისთვის, კლინიკაში 3 პაციენტი მკურნალობს.
„კიდევ ერთმა პაციენტმა დაამარცხა ვირუსი, ჯამში უკვე 49 გამოჯანმრთელებული გვყავს. კლინიკის ბოქსირებულ განყოფილებაში რჩება 3 პაციენტი, მათი ჯანმრთელობის მდგომარეობა დამაკმაყოფილებელია“, – ამბობს ნადირაძე.
ცნობისთვის, ბოლო 7 დღის განმავლობაში, ქუთაისის ინფექციურ კლინიკაში კორონავირუსის ახალი შემთხვევა არ დაფიქსირებულა.
Stopcov.ge-ს მონაცემების მიხედვით, 18 ივლისს საქართველოში კორონავირუსით ინფიცირების 8 ახალი შემთხვევა გამოვლინდა და 10 ადამიანი გამოჯანმრთელდა.
- ბოლო 24 საათში საქართველოში:
- კორონავირუსით ინიფიცრებულია - 1018 ადამიანი;
- გამოჯანმრთელებულია - 895;
- გარდაცვლილია - 15;
- კარანტინის რეჯიმში რჩება - 5627;
- სტაციონარული მკურნალობის ქვეშ - 228, მათ შორის საქართველოში სამკურნალოდ ჩამოყვანილია - 41 პაციენტი.
შეგახსენებთ, კორონავირუსის პირველი დადასტურებული შემთხვევა საქართველოში 26 თებერვალს გამოვლინდა.
მსოფლიოში კი კორონავირუსის მაჩვენებელმა 14 მილიონს გადააჭარბა.
