გორის მუნიციპალიტეტის მერიამ ჯერ არ დაფუძნებული სააგენტოსთვის ახალი ავტომობილები იყიდა. საუბარია მუნიციპალური ინსპექციის ა(ა)იპ-ზე, რომლის დაფუძნებაზე თანხმობა საკრებულომ მერიას გასულ წელს მისცა, - ინფორმაციას რეგიონული მედია "მოზაიკა" ავრცელებს.
არსებული ინფორმაციით საერთო ჯამში 5 ავტომობილისთვის 260 000 ლარამდე დაიხარჯა. როგორც გორის მუნიციპალიტეტის საფინანსო სამსახურის ხელმძღვანელი დალი ტლაშაძემ განმარტა, აღნიშნული ავტომობილებისთვის თანხა გასულ წელს იყო გათვალისწინებული.
"5 ავტომობილის ღირებულება 260 ათასამდეა, ამ ავტომობილებისთვის თანხა 2022 წელსაც იყო და რადგან კონტრაქტი უკვე განხორციელდა, ავსახეთ 2023 წლის ბიუჯეტში" - ამბობს დალი ტლაშაძე.
გორის მერიაში კი განმარტავენ, რომ ა(ა)იპ-ის იურიდიულად დაფუძნებამდე, აუცილებელია მისი მომზადება და ტექნიკურად გამართვა, აღნიშნული ავტომობილები კი სწორედ, ამ მიზნით შეიძინეს.
"სანამ ა(ა)იპ- ი დაფუძნდება, წინასწარ გაფორმდა ხელშეკრულება, შევიძინეთ ავტომობილები, რათა ახალ სააგენტოს მოემსახუროს. იურიდიულად დაფუძნებამდე, ა(ა)იპ-ი ტექნიკურად გამართული და უზრუნველყოფილი უნდა იყოს" , – თქვა გორის მერიის ადმინისტრაციული შესყიდვების სამსახურის ხელმძღვანელმა ლექსო თარხნიშვილმა.
ცნობისთვის, გორის მუნიციპალური ინსპექციის ა(ა)იპ-ისთვის ჯერ არც ხელმძღვანელი და თანამშრომლები არ შეურჩევიათ.
