ვარსკვლავი, რომელმაც დროსა და ეპოქებს გაუძლო, კაშკაშა არტისტი, რომლის სიდიდემ და უბრალოებამ მთელი ქვეყანა გააერთიანა. ბუბა კიკაბიძეს დღეს ერი და ბერი, ხელისუფლება და ოპოზიცია, ყველა თაობის წარმომადგენელი ერთად ემშვიდობებოდა. საბჭოთა კლიშეებისგან თავისუფალი მიმინო, ექიმი ბენჟამენი, მედროგე პავლე უნიკლაური არტისტი და უბრალოდ ხალხის რჩეული დღეს იმ სცენიდან გააცილეს, სადაც ის ნახევარ საუკუნეზე მეტ ხანს მღეროდა.
ბუბა კიკაბიძეს დღეს არამხოლოდ საქართველოში, მთელ პოსტსაბჭოთა სივრცეში, განსაკუთრებით კი უკრაინაში ემშვიდობებოდნენ. მისი ხსოვნისთვის პატივის მისაგებად საქართველოში უკრაინის კულტურის მინისტრი საგანგებოდ ჩამოვიდა და ფილარმონიაში შეკრებილებს სიტყვით მიმართა. სამგლოვირო ცერემონია კი რომელიც დიდ საკონცერტო დარბაზში გაიმართა, უკრაინულ არხებზეც გადაიცემოდა. მიმინო წავიდა, ეპოქა დასრულდა, თუმცა ლეგენდა ბუბა კიკაბიძე კვლავ ცოცხალია.
ავტორი: ზურა პეტროსიანი
