"ევროპული საქართველოს" ლიდერებმა სამგორის აქტივს ერთიანი ოპოზიციის მიერ სამგორის
მაჟორიტარობის კანდიდატად დასახელებული ლევან ხაბეიშვილი წარუდგინეს. ამის შესახებ ინფორმაციას და ფოტომასალას პარტიის გენერალური მდივანი გიგი უგულავა "ფეისბუქის" საკუთარ გვერდზე ავრცელებს.
დღეს "ევროპული საქართველოს" სამგორის წარმომადგენლობა ოპოზიციის ერთიან კანდიდატ ლევან ხაბეიშვილს შეხვდა. ჩვენი ურყევი პიზიციაა, რომ ერთიანი მაჟორიტარები აუცილებელია საერთო გამარჯვებისთვის - ივანიშვილის მოსაშორებლად. ამასთანავე, ეს არ უშლის ხელს, უფრო პირიქით, რომ პარტიების ნაწილში იყოს მრავალფეროვნება. ამიტომ, "ევროპული საქართველოს" მხარდამჭერები სამგორში ვხაზავთ 2, ხოლო მაჟორიტარის ნაწილში ლევან ხაბეიშვილს ნომრით 5. წარმატება მას და მთლიანად ოპოზიციას ამ ისტორიულ დაპირისპირებაში, - წერს უგულავა.
შეგახსენებთ, რომ "ლეიბორისტული პარტიის" მაგიდის ირგვლივ გაერთიანებულმა ოპოზიციამ თბილისის ექვს მაჟორიტარულ ოლქში საერთო კანდიდატები 19 ივნისს წარადგინა. სია ასეთა:
- ვაკის რაიონში კენჭს "ევროპული საქართველოს" წევრი ელენე ხოშტარია იყრის;
- გლდანში მაჟორიტარობისთვის "ნაციონალური მოძრაობის" ერთ-ერთი ლიდერი ნიკა მელია იბრძოლებს;
- ამავე პარტიის წევრი, ლევან ხაბეიშვილი სამგორის ოლქში წარადგინეს;
- მთაწმინდის რაიონში მაჟორიტარი დეპუტატობის კანდიდატი "თავისუფალი დემოკრატების" ლიდერი შალვა შავგულიძე იქნება;
- "ლეიბორისტული პარტიის" ლიდერი შალვა ნათელაშვილი კი კენჭს ნაძალადევში იყრის;
- ისანში კი ოპოზიციის წევრებმა "ახალი საქართველოს" ლიდერი, გიორგი ვაშაძე წარადგინეს.
დიდუბე-ჩუღურეთისა და საბურთალოს ოლქებში წარსადგენკანდიდატებთან დაკავშირებით კონსულტაციები ამ დრომდე გრძელდება.
