"მივმართავ ბატონ მიხეილს, თავი არ უნდა იგრძნოს მარტო!" | "დროა" ოპოზიციას თანამშრომლობისკენ მოუწოდებს - საგანგებო განცხადება
გამოქვეყნდა:
"მივმართავ ბატონ მიხეილს, თავი არ უნდა იგრძნოს მარტო!" - ამის შესახებ პარტია "დროას" ლიდერი ელენე ხოშტარია საგანგებო ბრიფინგზე საუბრობს და ოპოზიციას თანამშრომლობისკენ მოუწოდებს.ამ განცხადებით ის მოსამართლე არევაძის გადაწყვეტილებას ეხმაურება, რომელმაც მიხეილ სააკაშვილი პატიმრობაში დატოვა.
მიიღეს სასტიკი გადაწყვეტილება, რომელიც ეხება არამხოლოდ მიხეილ სააკაშვილს, არამედ ეს არის მთელი ქვეყნის პრობლემა. წარმოუდგენელია, რომ ჩვენ თვალწინ ადამიანის ღირსებისა და ჯანმრთელობის შელახვა ხდება ასეთი თავხედური ფოორმით. ამ პროცესს არანაირი საერთო არ ჰქონია არცერთ ეტაპზე სამართალთან, მორალთან ან რაიმე სიმართლის დადგენასთან. ეს არის პირდაპირი, ღია შურისძიება და ჩვენს თვალწინ ადამიანის გათელვა.
ეს ადამიანი არის საქართველოს მესამე პრეზიდენტი, და მე არ ვიცი ვინ აღიქვამს დღეს ამას და ვინ არა, მაგრამ ეს არის ძალიან მძიმე საქართველოს ყველა მოქალაქისთვის.
რა თქმა უნდა, ეს საკითხი სცდება მხოლოდ "ნაციონალური მოძრაობის" ჩარჩოებს. მე პირველ რიგში მინდა ბატონ მიხეილს მივმართო ციხეში და ვუთხრა, რომ მან არ უნდა იგრძნოს თავი მარტო და ის არ იმსახურებს ამ მოქცევას. საქართველოს მოქალაქეებისგან, საქართველოს სახელმწიფოსგან საქართველოს მესამე პრეზიდენტი, არცერთი ადამიანი არ იმსახურებს და მან მინდა მიიღოს ჩემი პირადი და ჩვენი გუნდის მხარდაჭერა.
ასევე, მინდა აღვნიშნო, რომ როგორც ვთქვი, ეს სცდება ნაციონალური მოძრაობის ჩარჩოებს და, რა თქმა უნდა, ჩვენ მზად ვართ რომ მივიღოთ მონაწილეობა იმ აქტივობებში, რაც არის აუცილებელი. მე ვთავაზობ თანამშრომლობას, კონსულტაციებს იმისთვის, რომ კოორდინირებულად, მკაფიოდ, გონივრულად ვიმუშაოთ ქვეყნის შიგნით. ეს არის პროტესტი, ეს არის აქციები. და ქვეყნის გარეთ, იმისთვის, რომ გადავარჩინოთ მიხეილ სააკაშვილის სიცოცხლე, - ამბობს ხოშტარია.
ის სალომე ზურაბიშვილთან დაკავშირებითაც საუბრობს და ამბობს, რომ დროა, რომ პრეზიდენტმა გადაწყვეტილება მიიღოს.
გავიდა დრო, როდესაც სალომე ზურაბიშვილს შეუძლია გააგრძელოს დუმილი მე არ ვიცი ვის რისი იმედი აქვს, მაგრამ მე ზუსტად ვიცი, ვის რისი პასუხისმგებლობა აქვს. და დღეს სალომე ზურაბიშვილის პასუხისმგებლობაა არის ძალიან მაღალი. მან უნდა გააკეთოს არჩევანი და საბოლოო ჯამში მიიღოს გადაწყვეტილება, ან ისე, და აიღოს პასუხისმგებლობა რომ ისიც აწერს ამ განაჩენს ხელს, ან ასე და გადაარჩინოს ადამიანის სიცოცხლე და მათ შორის ჩვენი ქვეყნის ევროპული მომავალი, - ამბობს ხოშტარია.
შეგახსენებთ, რომ მოსამართლე გიორგი არევაძემ მიხეილ სააკაშვილის სასჯელის გადავადების ან გათავისუფლების საქმეზე დაცვის მხარის მოთხოვნა არ დააკმაყოფილა და საქართველოს მესამე პრეზიდენტი პატიმრობაში დატოვა.
მანამდე საქალაქო სასამართლოში საქართველოს მესამე პრეზიდენტის, მიხეილ სააკაშვილის სასჯელის გადავადების ან გათავისუფლების საქმეზე სხდომა დასკვნითი სიტყვებით განახლდა. გადაწყვეტილება კი მოსამართლე არევაძემ სწორედ ადვოკატებისა და პენიტენციური სამსახურის წარმომადგენლების მოსმენის შემდეგ გამოაცხადა.
