გელათის პრობლემებთან დაკავშირებული სამუშაო ჯგუფის სხდომა 1 კვირით გადაიდო
გამოქვეყნდა:
გელათის სამონასტრო კომპლექსის პრობლემებთან დაკავშირებული სამუშაო ჯგუფის სხდომა სამინისტროსა და საპატრიარქოს წარმომადგენლების მონაწილეობით, ერთი კვირით გადაიდო და ის 17 თებერვლის ნაცვლად, 24 თებერვალს ჩატარდება. მიზეზად წულუკიანის უწყება სამუშაო გრაფიკს ასახელებს:
"მაღალი საზოგადოებრივი ინტერესის გათვალისწინებით, გაცნობებთ, რომ საქართველოს კულტურის, სპორტისა და ახალგაზრდობის სამინისტრომ და საქართველოს საპატრიარქომ მიიღეს ერთობლივი გადაწყვეტილება, საორგანიზაციო საკითხების უკეთ მოგვარების მიზნით და შეხვედრაში მონაწილე პირთა სამუშაო გრაფიკის მხედველობაში მიღებით, გელათის სამონასტრო კომპლექსის პრობლემებთან დაკავშირებული სამუშაო ჯგუფის სხდომა გადაიდოს ერთი კვირით და ჩატარდეს 24 თებერვალს.
შეგახსენებთ, რომ იუნესკომ დადებითად შეაფასა 2021 წელს კულტურის სამინისტროს მიერ გელათის პრობლემებთან დაკავშირებით სამუშაო ჯგუფის შექმნა და მის ფარგლებში მუშაობა და თავის დასკვნაში სახელმწიფოს პროცესის განახლებისკენ მოუწოდა.
კულტურის სამინისტრომ მაშინვე გაითვალისწინა მოცემული რეკომენდაცია და თავდაპირველად სხდომა ჩაინიშნა 17 თებერვალს." ნათქვამია კულტურის სამინისტრის განცხადებაში.
