"ვაპირებდით მისვლას და მშვიდობიან პროტესტს..." - კობახიძემ თსუ-ში ლექცია გააუქმა

თბილისის სახელმწიფო უნივერსიტეტის სტუდენტი, მამუკა ჩხეიძე სოციალურ ქსელში წერს, რომ ირაკლი კობახიძის ლექცია გაუქმდა. მისივე ინფორმაციით, სტუდენტები  შაბათს, ლექციაზე მისვლას და მშვიდობიან  პროტესტს აპირებდნენ, თუმცა კობახიძემ ლექცია გააუქმა. 

მისივე ინფორმაციით, ლექციები ბოლო დღეებში არც "ოცნების" კიდევ ერთ დეპუტატს, გიორგი კახიანს ჩაუტარებია.

"თსუ-ში ირაკლი კობახიძე ლექციას ატარებს განრიგის მიხედვით შაბათს 10:00 საათზე.

სტუდენტები, რომლებისთვისაც მიუღებელია მის მიერ სალექციო კურსის წაკითხვა და მისი მოღალატეობრივი საქმიანობა, ვაპირებდით მისვლას და მშვიდობიან პროტესტს. რაც გულისხმობდა შემდეგს - აუდიტორიაში მივიტანდით პლაკატებსა და მისსავე წიგნებს, რასაც ვაჩვენებდით და დავუტოვებდით ყოველგვარი ხმაურისა და ძალადობის გარეშე.

ცოტა ხნის წინ, მის სალექციო ჯგუფში რეგისტრირებულ სტუდენტებს მიუვიდათ შეტყობინება, რომ ლექცია არ ჩატარდება..

ესაა იმ "კაცის" სახე, რომელიც ვერ ბედავს სტუდენტებთან თამამად გამოჩენას. საერთოდ ყოველთვის დაცვით დადის, აუდიტორიის წინ მუდმივად დგას დაცვის ორი თანამშრომელი, თითქოს მას ვინმე ემუქრებოდეს. ახლა კი ლექციის ჩატარებასაც ვერ ბედავს, რადგან კარგად იცის, რომ სწორედ ის Gen Z დახვდება ადგილზე, რომელიც ლამის სასიკვდილოდ გაიმეტა ორი ღამის განმავლობაში.

ეგ Gen Z დაგამთავრებთ! 

პ.ს. არც გიორგი კახიანს ჩაუტარებია დარბევის შემდეგ დღეს (ხუთშაბათს დილით) ლექცია" წერს სტუდენტი