აქონდროპლაზიით დაავადებული ბავშვების მშობლები, მათი შვილებისთვის აუცილებელი წამლის შემოტანის მოთხოვნით, ხელმოწერებს აგროვებენ. პეტიციაში ნათქვამია, რომ ერთი წელია მშობლები ტყუილებს ისმენენ და ქვეყანას სასიცოცხლოდ მნიშვნელოვანი მედიკამენტი ვერ შემოაქვს 20-მდე ბავშვისთვის.
"რა ვუთხრათ შვილებს? როგორ ავუხსნათ რომ ვინაიდან ამ ქვეყანაში დაიბადნენ, და არა ევროკავშირის რომელიმე ნებისმიერ ქვეყანაში ან ამერიკის ნებისმიერ შტატში უნდა განწირულები იყვნენ საკუთარი ქვეყნის მთავრობის მიერ???
როგორ ავუხსნათ რომ თუ მათი მშობლები არ გადაიხვეწებიან სხვა ქვეყანაში ლტოლვილებად, არ წაიყვანენ უცხო ქვეყანაში საკუთარ შვილებს, არ დატოვებენ ჩვენი შვილები მშობლიურ ოჯახებს, საბავშვო ბაღებსა თუ საკლასო ოთახებს და არ იცხოვრებენ უცხო ქვეყნის ლტოლვილთა ბანაკებში, საკუთარი სახელმწიფოს ჯანდაცვა არ აპირებს მათზე ზრუნვას????
საქართველოს ექიმებო, ჯანდაცვის სამართლიანო ხელმძღვანელებო, გულითადო ადამიანებო, გვიშველეთ, მოგვეხმარეთ, გვიშუამდგომლეთ, მიაღებინეთ პოლიტიკური გადაწყვეტილება ჩვენს მთავრობას!!!! - წერია პეტიციაში.
აქონდროპლაზია გენეტიკური დაავადებაა, როცა ბავშვის სხეული ასიმეტრიულად ვითარდება და ის დაახლოებით 25 ათასიდან ერთ შემთხვევაში ვლინდება. წამალი, რომელიც ბავშვებისთვის სასიცოცხლოდ მნიშვნელოვანია დღეს საქართველოში არ შემოდის. მშობლები ამბობენ, რომ რომ შემოდიოდეს, დახმარების გარეშე, პირადი სახსრებით ვერ შეძლებენ მის შეძენას.
მედიკამენტის შემოტანის მოთხოვნოთ მშობლებმა ჯანდაცვის სამინისტროსთან აქცია არაერთხელ გამართეს.
