"დღეს ჩემი შვილის დაბადების დღეა და ქუჩაში ვდგავართ, წამლის მოთხოვნით" - აქცია ჯანდაცვის სამინისტროსთან

ამ წუთებში ჯანდაცვის სამინისტროსთან აქონდროპლაზიის სინდრომის მქონე ბავშვების მშობლები აქციას მართავენ. მშობლები ბავშვებისთვის სასიცოცხლოდ აუცილებელი კონკრეტული წამლის საქართველოში შემოტანას და მის დაფინანსებას ითხოვენ.

მშობლებს პრობლემა წელიწადზე მეტია აქვთ, ამ პერიოდის განმავლობაში მათ არაერთი აქცია გამართეს. წარსულში პროტესტის მონაწილეებს შეხვდა მინისტრის მოადგილე, თამარ გაბუნია, სამინისტროში შეიქმნა სპეციალური ჯგუფი, რომელსაც ამ საკითხზე უნდა ემუშავა, თუმცა წამალი ქვეყანაში ისევ არაა. 

მშობლები ამბობენ, რომ მედიკამენტის მიღებას აზრი მაშინ აქვს, როცა ორგანიზმი ზრდის პროცესშია და თუ ბავშვები ამ პერიოდს მის გარეშე გაივლიან, შემდეგ წამალი ეფექტური ვეღარ იქნება. 

"ჩამოვედი გურდიიდან სპეციალურად დღევანდელი დღისთვის, რათა მშობლებს დავუდგე გვერდით. მეც აქონდროპლაზიის მქონე ბავშვის მშობელი ვარ, ნინის, დღეს დაბადების დღე აქვს და მიუხედავად ამისა, ვდგავართ ქუჩაში, წამლის მოთხოვნით, ვითხოვთ სასიცოცხლოდ მნიშვნელოვან წამალს, რომ სრულფასოვანი მოქალაქე იყოს ბავშვი და არ ჰქონდეს შეზღუდვები, კომპლექსები მისი მდგომარეობიდან გამომდინარე", - ამბობს აქციის მონაწილე მშობელი, ნაზი ოჩხიკიძე. 

მშობლები ითხოვენ კონკრეტულ პასუხს, აფინანსებს წამლის შემოტანას სახელმწიფო თუ არა და როდის შემოვა ის.

ავტორი: ნინო ჟიჟიაშვილი.