ერთადერთი სწორი გადაწყვეტილება რესპუბლიკურის სამედიცინო უნივერსიტეტისთვის გადაცემა იქნება - კახა ოქრიაშვილი
გამოქვეყნდა:
ოპოზიციონერი დეპუტატი, კახა ოქრიაშვილი რესპუბლიკური საავადმყოფოს ექიმების პროტესტს ეხმაურება და ამბობს, რომ ერთადერთი სწორი გადაწყვეტილება იქნება კლინიკის გადაცემა სამედიცინო უნივერსიტეტს მმართველობისთვის.
ოქრიაშვილი წერს, რომ არაა გამორიცხული საავადმყოფო დაანგრიონ და აღარ ააშენონ, სცენარის ამგვარად განვითარებას კი სამედიცინო საზოგადოება არ დაუშვებს.
"კიდევ ერთხელ ვეხმაურები რესპუბლიკური საავადმყოფოს გარშემო ატეხილ აჟიოტაჟს - ამ საკითხზე ერთადერთი სახელმწიფოებრივად სწორი გადაწყვეტილება იქნება რესპუბლიკური საავადმყოფოს გადაცემა თბილისის სახელმწიფო სამედიცინო უნივერსიტეტის მმართველობაში.
სამედიცინო უნივერსიტეტი და რესპუბლიკური საავადმყოფო გვერდიგვერდ სწორედ იმის გათვალისწინებით აშენდა, რომ რესპუბლიკური საავადმყოფო იყო ქართული მედიცინის მთავარი სასწავლო ბაზა. საკითხი, ეს შენობა დაინგრეს, თუ მოხდეს მისი რენოვაცია, უნდა გადაწყვიტოს სამედიცინო უნივერსიტეტის და რესპუბლიკური საავადმყოფოს ხელმძღვანელობამ. ნებისმიერი გადაწყვეტილების შემთხვევაში, პროცესი უნდა წარიმართოს ეტაპობრივად და იმგვარად, რომ სამედიცინო მომსახურება და სტუდენტების აღზრდა არ შეჩერდეს და არ შეფერხდეს.
მითქმა-მოთქმა ისმის იმაზეც, რომ ქალაქის ცენტრში არსებული 8 ჰექტარი ფართობის ტერიტორია, რომლის მინიმალური ღირებულება 80-100 მილიონი დოლარია, სასურველი ლუკმაა და არსებული შენობის დანგრევის შემდეგ, იქ საავადმყოფო აღარ აშენდება. საზოგადოებამ ისიც იცის, როგორ ღიად და ურცხვად არის ჩაბმული „ქართული ოცნება“ სისტემურ კორუფციაში, ასე რომ, გამორიცხული არაფერია.
ჩვენ, სამედიცინო საზოგადოება, სცენარის ამგვარად განვითარებას არ დავუშვებთ!' - წერს ოქრიაშვილი.
