"არ გვაქვს ზღაპრების მოსმენის დრო" - პარლამენტში აზარაშვილს აქონდროპლაზიის მქონე ბავშვთა მშობლები ხვდებიან

პარლამენტში, ადამიანის უფლებათა კომიტეტზე ჯანდაცვის მინისტრს უსმენენ. ზურაბ აზარაშვილი საკანონმდებლო ორგანოში ფრაქცია "ლელომ" დაიბარა, რითაც აქონდროპლაზიის სინდრომის მქონე ბავშვების მშობლებს მინისტრთან შეხვედრის საშუალება მიეცათ.

მშობლები რამდენიმე თვე სამინისტროსთან აქციას მართავდნენ აზარაშვილთან შეხვედრის მოთხოვნით. სხდომა დახურულ რეჟიმში მიმდინარეობს. 

"ჩვენ მოსული ვართ დღეს იმისთვის, რომ ჯანდაცვის მინისტრს, რომელსაც 4 თვის განმავლობაში ქუჩაში ვთხოვდით შეხვედრას და არანაირი რეაგირება არ ჰქონდა, მოვედით და კონკრეტულად, არ გვჭირდება ზედმეტი არგუმენტები, ვითხოვთ დაფინანსებას ჩვენი შვილებისთვის, მედიკამენტ  ვოზორიტიდის შემოტანას ჩვენ ქვეყანაში, რომ ჩვენმა შვილებმა უახლოეს კვირებში დაიწყონ ამ მედიკამენტით მკურნალობა. ვითხოვთ პარალელურად პრემიერთან შეხვედრას. ჩვენ არ გავჩერდებით, სანამ ჩვენი შვილები არ დაიწყებენ მედიკამენტით მკურნალობას ისე, როგორც დანარჩენ სხვა ქვეყნებში", - ერთ-ერთმა მშობელმა.

მშობლები ამბობენ, რომ ბავშვებს გართულებული მდგომარეობა აქვთ და უმნიშვნელოვანესია, რომ მედიკემანტი სწრადად მიიღონ. 

"ლელოში" ამბობენ, რომ საკითხს პოლიტიკური გადაწყვეტილება სჭირდება. 

აქონდროპლაზია გენეტიკური დაავადებაა, როცა ბავშვის სხეული ასიმეტრიულად ვითარდება და ის დაახლოებით 25 ათასიდან ერთ შემთხვევაში ვლინდება. წამალი, რომელიც ბავშვებისთვის სასიცოცხლოდ მნიშვნელოვანია დღეს საქართველოში არ შემოდის. მშობლები ამბობენ, რომ რომც შემოდიოდეს, დახმარების გარეშე, პირადი სახსრებით ვერ შეძლებენ მის შეძენას.

ავტორი: ნინი ბალანჩივაძე.