"გვქონდა მთელი რიგი შენიშვნები და ჩვენს მოსაზრებებს ორივე მომხსენებელს გავუზიარებთ" | კობახიძე სტრასბურგში

"ქართული ოცნების" თავმჯდომარის, ირაკლი კობახიძის თქმით, ქართული დელეგაცია ევროპის საბჭოს საპარლამენტო ასამბლეაში იღებს მონაწილეობას. 

მისივე თქმით, რჩება ორი მნიშვნელოვანი საკითხი, რომელზეც უნდა დასრულდეს მუშაობა - ეს არის დეოლიგარქიზაციისა და სასამართლო რეფორმის თემები. გარდა ამისა, კობახიძის თქმით, ჰქონდათ შენიშვნებიც. 

"ჩვენი დელეგაცია აქტიურ მონაწილეობას მიიღებს ევროპის საბჭოს საპარლამენტო ასამბლეის მუშაობაში, ამ ფორმატს ყოველთვის ვიყენებთ, რომ კოლეგებს ვესაუბროთ სხვადასხვა აქტუალურ თემებზე, ჩვენი ქვეყნისთვის მნიშვნელოვან საკითხებზე, მათ შორის, 12 პუნქტზე, კანდიდატის სტატუსზე. ეს არის მნიშვნელოვანი ფორმატი, რომელიც ამ ყველაფერზე დისკუსიის საშუალებას გვაძლევს. ჩვენ გვაქვს მნიშვნელოვანი პროგრესი, რჩება ორი მნიშვნელოვანი საკითხი, რომელზეც უნდა დასრულდეს მუშაობა - ეს არის დეოლიგარქიზაციის და სასამართლო რეფორმის თემები. ამ ყველაფერზეც მივაწვდით კოლეგებს ინფორმაციას ამ ფორმატშიც. გვექნება შეხვედრა ორივე მომხსენებელთან და ვესაუბრებით იმასთან დაკავშირებით, როგორ ვითარდება პროცესები ქვეყანაში. მათთან ერთად ვიმსჯელებთ იმ ანგარიშზეც, რომელიც მათ გამოაქვეყნეს ცოტა ხნის წინ. ჩვენ გვქონდა მთელი რიგი შენიშვნები და ჩვენს მოსაზრებებს ორივე მომხსენებელს გავუზიარებთ", - ამბობს კობახიძე.

შეგახსენებთ, ირაკლი კობახიძე საპარლამენტო დელეგაციასთან ერთად, რომლის შემადგენლობაშიც არჩილ თალაკვაძე, ირაკლი ჩიქოვანი, ხატია წილოსანი, გივი მიქანაძე და ეკა სეფაშვილი არიან, სტრასბურგში იმყოფება.