დოკუმენტის ხელში დაჭერამდე პროტესტს ვაგრძელებთ - დედებმა კანცელარიასთან კიდევ ერთი ღამე გაათენეს

აქონდროპლაზიის სინდრომის მქონე ბავშვების მშობლებმა მთავრობის კანცელარიასთან მეთექსვსმეტე ღამე გაათენეს. მათ ჯერ ისევ არ აქვთ კონკრეტული პასუხი, როდის შემოიტანენ ბავშვებისთვის საჭირო მედიკამენტ - ვოზორიდიტს.

გუშინ ჯანდაცვის სამინისტროს წარმომადგენლები აქონდროპლაზიის დიაგნოზის მქონე პაციენტების მშობლებს შეხვდნენ. მშობლები ამბობენ, რომ პროტესტი გაგრძელდება მანამ, სანამ წამლის შემოტანაზე კონკრეტული დოკუმენტი არ ექნებათ.

"ჩვენ აქციას ვაგრძელებთ უწყვეტ რეჟიმში, ღამის თევით, თან ვართ სამუშაო პროცესში ჩართულები. მანამ, სანამ ხელში დავიჭერთ დოკუმენტს, რომ ეს წამლის დანერგვის, წამლის შემოტანის პროცედურა არ გაიწელება დროში, და გონივრულ ვადებში იქნება შემოტანილი და დანერგილი, ამ დოკუმენტის ხელში დაჭერამდე ჩვენ გვიწევს პროტესტის ამ ფორმაზე უარი ვერ ვთქვათ, რადგან გვაქვს გრძელვადიანი გამოცდილება მედიკამენტის შემოტანაზე დროის გაწელვის, ამ გამოცდილების გამო არ გვაქვს უფლება, რომ დავიშალოთ", - ამბობს მაკა გოჩიაშვილი.

სამინისტროს წარმადგენლებმა გუშინნ მშობლებს სამოქმედო გეგმა გააცნეს. მხარეები შეთანხმდნენ, რომ მშობლები ჩართულნი იქნებიან იშვიათი დაავადებების საკითხებზე მომუშავე საკოორდინაციო საბჭოს ფორმატში. საბჭოს მორიგი სხდომა, მშობლების მონაწილეობით 5 მაისს გაიმართება.