წელს, პირველად, საქართველოს ჰყავს პატიმარი მედიამენეჯერი, მედიის მდგომარეობა მნიშვნელოვნად გაუარესდა - კოალიცია
გამოქვეყნდა:
მედიის ადვოკატირების კოალიცია პრესის თავისუფლების საერთაშორისო დღესთან დაკავშირებით განცხადებას ავრცელებს და წერს, რომ უკანასკნელი წლების განმავლობაში საქართველოში მედიის მდგომარეობა მნიშვნელოვნად გაუარესდა.
კოალიცია აღნიშნავს, რომ წელს, პირველად, საქართველოს ჰყავს პატიმარი მედია მენეჯერი, "მთავარი არხის" დამფუძნებელი და გენერალური დირექტორი, ნიკა გვარამია. კოალიცია ხელისუფლებას კიდევ ერთხელ მოუწოდებს, უზრუნველყოს მედიისთვის უსაფრთხო სამუშაო გარემო და დაიცვას სიტყვისა და გამოხატვის თავისუფლება ქვეყანაში.
"უკანასკნელი წლების განმავლობაში საქართველოში მედიის მდგომარეობა მნიშვნელოვნად გაუარესდა. ჟურნალისტებზე ფიზიკური თავდასხმები, უკანონო თვალთვალი, საჯარო ინფორმაციაზე წვდომის შეზღუდვა, პოლიტიკურად მოტივირებული გამოძიებები და სასამართლო პროცესები არის მხოლოდ ნაწილი იმ გამოწვევებისა, რომელთა წინაშეც დგას კრიტიკული მედია.
წელს, პირველად, საქართველოს ყავს პატიმარი მედია მენეჯერი, რომლის საქმეც გავლენიანი ადგილობრივი და საერთაშორისო ორგანიზაციების მიერ შეფასებულია, როგორც პოლიტიკურად მოტივირებული და ტელეკომპანია „მთავარის“ დირექტორი ნიკა გვარამია შეყვანილია პროფესიული საქმიანობისთვის დაპატიმრებული ჟურნალისტების სიაში.
მედიის ადვოკატირების კოალიცია მოუწოდებს ხელისუფლებას გააცნობიეროს თავისი ვალდებულება და უზრუნველყოს მედიისთვის უსაფრთხო სამუშაო გარემო და დაიცვას სიტყვისა და გამოხატვის თავისუფლება ქვეყანაში", - ნათქვამია განცხადებაში.
