ტვირთის გადაზიდვა, ზემო ლარსის სასაზღვრო პუნქტის გახსნა - მოსკოვში რუსულ-ქართული ბიზნეს საბჭოს სხდომა გაიმართა

რუსეთის სავაჭრო-სამრეწველო პალატაში (CCI) 19 ივნისს რუსულ-ქართული ბიზნეს საბჭოს სხდომა გაიმართა.

CCI-ის ვებგვერდზე გავრცელებული ინფორმაციით ირკვევა, შეხვედრა ორ ქვეყანას შორის ლოგისტიკის, დაზღვევისა და საქონლის ტრანზიტის საკითხების განხილვას დაეთმო.

შეხვედრის გახსნისას რუსეთის სავაჭრო-სამრეწველო პალატის ვიცე-პრეზიდენტმა, ვლადიმერ პადალკომ განაცხადა გარემონტებული და გაუმჯობესებული ზემო ლარსის სასაზღვრო პუნქტის გახსნის შესახებ, რომელიც, მისი თქმით, ხელს უწყობს საქართველოსა და რუსეთს შორის კომუნიკაციას.

სავაჭრო-სამრეწველო პალატის ინფორმაციით, განიხილეს საქართველოდან სატვირთო მანქანებისა და მძღოლების რუსეთში ტვირთის გადაზიდვაზე დაშვების საკითხი. შეხვედრის მონაწილეებმა ასევე წარმოადგინეს წინადადებები საქართველოსა და რუსეთს შორის საინვესტიციო თანამშრომლობის შესახებ ლოგისტიკისა და ინფრასტრუქტურის სფეროში, მათ შორის ახალი სატრანსპორტო დერეფნების გახსნის შესაძლებლობის შესახებ.

"ეხო კავკაზა" წერს, რომ რუსეთის სავაჭრო-სამრეწველო პალატის პრეზიდენტმა, სერგეი კატირინმა მაისში გამოაცხადა აფხაზეთის თვითგამოცხადებული რესპუბლიკის ტერიტორიაზე სარკინიგზო ტრანზიტის დაწყების აუცილებლობის შესახებ.

რუსულ-ქართული ბიზნეს საბჭო მიმდინარე წლის თებერვალში შეიქმნა. მის ლიდერად აირჩიეს კომპანია IK Rumb-ის დირექტორთა საბჭოს ხელმძღვანელი, კულტურული და ისტორიული მემკვიდრეობის დაცვისა და მდგრადი ტურიზმის განვითარების ეროვნული ფონდის ვიცე-პრეზიდენტი იური ბალაშოვი. მარტში იგი საქართველოს ეწვია, გამართა საქმიანი შეხვედრები ბიზნესის წარმომადგენლებთან და მოინახულა ღვინის ქარხნები კახეთის რეგიონში.