საქართველოს პარლამენტი საკანონმდებლო ორგანოს შენობაში უსაფრთხოების დამატებითი ზომების შესახებ განცხადებას ავრცელებს და ამბობს, რომ შენობაში დაშვების შეზღუდული რეჟიმი იმოქმედებს.
დღეს პარლამენტს პრემიერმინისტრი, ირაკლი ღარიბაშვილი ანგარიშს წარუდგენს.
"30 ივნისს, საქართველოს პარლამენტის სასახლეში და მიმდებარე ტერიტორიაზე უსაფრთხოების დაცვის რეჟიმის შესახებ საქართველოს პარლამენტის თავმჯდომარის 2016 წლის 30 დეკემბრის N259/3 ბრძანებით დადგენილი რეგულაციების შესაბამისად, იმოქმედებს პარლამენტის შენობაში დაშვების შეზღუდული რეჟიმი, გარდა აკრედიტებული საპარლამენტო მედიის წარმომადგენლებისა.
აღნიშნული ღონისძიების მიზანია, საქართველოს პარლამენტის წევრებისა და აპარატის თანამშრომლების უსაფრთხოების დაცვა და სამუშაო პირობების უზრუნველყოფა", - აღნიშნულია განცხადებაში.
საკანონმდებლო ორგანოსთან ირაკლი ღარიბაშვილს მოქალაქეების საპროტესტო აქციით დახვდებიან.
