"ექიმებმა უკვე დაასრულეს პროტოკოლი და იწყება ახალი ეტაპი - წამლის შემოტანა" | "აქონდროპლაზიის მქონე ადამიანები"
გამოქვეყნდა:
აქონდროპლაზიის სამკურნალო წამალი საქართველოში სექტემბრის თვემდე შემოვა, - ინფორმაციას არასამთავრობო ორგანიზაცია "აქონდროპლაზიის მქონე ადამიანები" ავრცელებს.
როგორც ორგანიზაცია წერს, ექიმებმა პროტოკოლზე მუშაობა უკვე დაასრულეს და 3 ივლისს, 16:00 საათზე საბჭოს გადამწყვეტი სხდომა ჩაინიშნა.
"ძვირფასო მხარდამჭერებო!
3 ივლისს, ორშაბათს, 16:00 საათზე მორიგი, გადამწყვეტი საბჭო ჩაინიშნა. ჩვენთვის აქ სრულდება გაწელილ ბიუროკრატიაში თანამონაწილეობა.
ექიმებმა უკვე დაასრულეს პროტოკოლი და იწყება ახალი ეტაპი - წამლის შემოტანა.
წამლის შემოტანა დაპირებულ, არაუგვიანეს სექტემბრისა.
რა არის ჩვენი მოლოდინი ამ სხდომიდან?
- რა კონკრეტულ, ქმედით ნაბიჯებს დგამენ ახლა იმისთვის, რომ ბავშვებმა სექტემბერში წამალი მიიღონ?
- რაიმე სახის ჩართულობა ხომ არ არის ჩვენგან, მშობლებისგან საჭირო, რომ პროცესი არ შეფერხდეს?
ბავშვები ელოდებიან სექტემბერს. წამლის პირველი დოზის მიღების თვეს", - წერს ორგანიზაცია.
