აშშ უკრაინისთვის დახმარების ახალ პაკეტს გამოაცხადებს, რომელიც კასეტურ საბრძოლო მასალას მოიცავს - CNN
გამოქვეყნდა:
შეერთებული შტატები 7 ივლისს უკრაინისთვის სამხედრო დახმარების ახალ პაკეტს გამოაცხადებს, რომელიც კასეტურ საბრძოლო მასალას მოიცავს. ამის შესახებ ინფორმაციას CNN აშშ-ის თავდაცვის უწყებიდან ოფიციალურ წყაროზე დაყრდნობით ავრცელებს.
გამოცემა წერს, რომ ბაიდენის ადმინისტრაცია ჯერ კიდევ გასულ კვირას განიხილავდა აღნიშნული საბრძოლო მასალის უკრაინაში გაგზავნის საკითხს.
როგორც ოფიციალური პირები CNN-თან განმარტავენ, უკრაინაში ბრძოლის ველზე პირობების შეცვლამ აშშ აიძულა, ამ გადაწყვეტილებაზე მსჯელობა დაეწყო.
კასეტური საბრძოლო მასალები აკრძალულია 100-ზე მეტ ქვეყანაში, რადგან ისინი ბომბებს დიდ ტერიტორიაზე ავრცელებენ. ბომბა შესაძლოა ადგილზე დარტყმის დროს ვერ აფეთქდეს და ნაღმების მსგავსად, გრძელვადიანი რისკი შექმნას. აშშ და უკრაინა ამ აკრძალვის ხელმომწერები არ არიან.
