რუსეთის ქალაქ ეკატერინბურგის მახლობლად, ურალის ელექტროქიმიურ ქარხანაში ბირთვულმა საწვავმა გაჟონა, - ამის შესახებ ინფორმაციას უკრაინული გამოცემა RBC.UA ავრცელებს.
გაჟონვა ელექტროქიმიური სადგურის ერთ-ერთი კონტეინერის მწყობრიდან გამოსვლამ გამოიწვია, რომელშიც ერთი კუბური მეტრის ოდენობის ურანი იყო მოთავსებული. შემთხვევა დღეს, 14 ივლისს ადგილობრივი დროით 9:13 საათზე მოხდა.
რუსული სამთავრობო გამოცემა Ria წერს, რომ ინციდენტის შედეგად ერთი ადამიანი გარდაიცვალა, თუმცა არ კონკრეტდება მისი ვინაობა.
თავის მხრივ, გარდაცვალების ფაქტს არ ადასტურებს Rosatom-ი და მას მოიხსენიებს როგორც დაშავებულს.
გამოცემა E1 აღნიშნავს, რომ გაჟონვის შემდეგ ელექტროქიმიური ქარხანის 100-მდე თანამშრომელს შეამოწმებენ. მათივე ცნობით, თუ ურანით სავსე კონტეინერი მართლაც დაზიანდა, ის ქიმიურ საფრთხეს წარმოადგენს გარშემო მყოფებისთვის.
რეგიონის გუბერნატორი, ვიაჩესლავ ტიუმენცევი ადგილობრივ მაცხოვრებლებს მოუწოდებს, არ აჰყვნენ პანიკას.
