პასუხისმგებლობის ნაცვლად საკუთარი მოქალაქეებისა და მედიის წინააღმდეგ აგორებული კამპანია - ქართული ოცნება თავდასხმის რეჟიმშია და ყველა ისარი ჟურნალისტებისკენ გადააქვს. გამოსავალს ხელისუფლება დუმილსა და გლოვაში ხედავს, მთავარი კი სამთავრობო გუნდისთვის ისაა, რომ მომხდარი მიიჩქმალოს და რაც შეიძლება შემცირდეს იმ კითხვების რაოდენობა, რომელთა პასუხებსაც ოცნების პასუხისმგებლობამდე მივყავართ. სტიქიას ვერავინ შეაჩერებს - ამას ამტკიცებს ხელისუფლება, თითქოს, ვინმე საპირისპიროს ამბობდეს - ამ პიარ-სტრატეგიით კი მთავარის გადაფარვა სურთ - შოვში რომ მონიტორინგისთვის განკუთვნილი სასიგნალო მოწყობილობები ყოფილიყო - მოსალოდნელი მეწყერისა და ღვარცოფის შესახებ ხალხი გაიგებდა და ამ სავალალო შედეგის წინაშე არ ვიქნებოდით.
